BONGHJORNU À TUTTI !
Semu u 23 d’aostu 2017 è affacca avà U Sciintificuchju à nantu à u Web !
U 12 d’aostu spuntaia à nantu à Twitter.
A so nàscita s’hè fatta edda u 22 di ghjinnaghju à nantu à Facebook. Eccu ciò ch’era u so prima postu di prisintazioni :
HÈ NATU U SCIINTIFICUCHJU (o Scinziateddu…), HÈ NATU !
HÈ UNA PÀCINA NOVA DIDICATA À A SCIENZA (o Scenzia…).
Si tratta di prumova l’usu di a lingua corsa parlendu di scienza… Si faci par vìa d’una silizzioni di nutizii sciintìfichi chì dopu sò tradutti in lingua corsa.
Si pò parlà d’archiulugìa, di biulugìa, di midicina, di giulugìa, di mitiurulugìa, di novi ticnulugìi… d’astrunumìa o di cunquista spaziali…
V’invitemu à viaghjà, in u passatu, u prisenti è l’avvena… cù una uchjata ancu pruspittiva !
I infurmazioni dati di règula sarani intirnaziunali, ma dinò poni essa più spicìfichi à a Còrsica.
A faremu in tutta umilità : cù a sola cunniscenza di u passiunatu è micca di u spicialistu ; senza fà da veru una inchiesta ma solu pizzichiddendu i infurmazioni quì è culà ; publichendu senza rigularità ma solu quandu u tempu a ci pirmetti…
Eti capitu tandu parchì ci chjamemu « U SCIINTIFICUCHJU »…
Spirendu ch’è vo sareti numarosi à truvà piaceri à suvitacci è chì ‘ssa pàcina nova farà prò à a lingua corsa !
À tutti vi dimu allora, à prestu o cari amichi facebookacci !
Hè oramai ‘ssu bloggu chì sparghjarà i nutizii sciintìfichi chì dopu sarani riliati da a so Pàcina Facebook è da u so contu Twitter. Intantu, tutti i infurmazioni dighjà publicati da ghjinnaghju ad avali à nantu à Facebook sò rimissi à nantu à ‘ssu bloggu, pricisendu inghji volta a data di u postu.
BONA LITTURA !
U Sciintificuchju 