Artìculu Facebook di u 17/06/17
‘Ssu 15 di ghjunghju sò stati rializati i Ghjurnati Di i Dutturanti à l’Univarsità « Pasquali Paoli » in Corti.
Hè data una impurtenza maiori à ´ssa ghjurnata dipoi 2010. Ni semu dunqua à l’uttèsima idizioni di ´ssa « nova fòrmula » è dipoi 185 tesi sò stati sustinuti.
Tutti l’anni i dutturanti sò tinuti di cuminicà pà ‘ssa ghjurnata, à nantu à i so travadda. Si faci sottu à a forma d’un cortu scrittu, po d’un Poster è ancu par certi, sottu à a forma d’una cuminicazioni urali.
Sò prisenti à ‘ssa ghjurnata i finanzori com’è a Cullittività Tarrituriali di Còrsica chì dà i solda pà i cuntratta dutturali (una borsa data à i studianti, attribuita sigondu à parechji criteria). Po ci sò ancu l’astituzioni chì à a fini rimèttini parechji premia par ricumpinsà i cuminicanti, veni à dì i Cunsiglia Dipartamintali, l’associu CPIE-A Rinàscita, i cità d’Aiacciu, di Bastia è di Corti.
Di sicuru i sughjetta trattati sò varii è i duminia tocchi sò numarosi, com’è par asempiu, « Mossa fiminista è naziunalìsimu corsu : clandistinità in parallelu ? » in Antrupulugìa (cù Caroline-Rose Torres), o « Cumpunenti vulatili di Frullania tamarisci, un ipàtica corsa » in Biuchìmica (cù Anaïs Pannequin), o dinò « Piattaforma rubòtica cù sistema multimudali appiigatu à i foca » in infurmàtica (cù Vito Ciullo : veda u ritrattu)…
À tutti ‘ssi circadori di l’Univarsità di Còrsica (150 dutturanti è 150 insignanti), « U Sciintificuchju » prega rièscita è bona furtuna.
#JDD2017UnivCorse #StudentDayUniversityCorsica
Ritrattu : U Sciintificuchju
U Sciintificuchju 