Artìculu Facebook di u 28/06/17
U ghjocu di Gò hè un ghjocu di stratigìa uriginariu da u Giapponu, mori praticatu in i paesa asiàtichi è più particularamenti in China. Par ghjucà ci voli à essa dui, punendu pitriceddi à nantu à una tavuletta. Si tratta di vincia u più pussìbuli di punta furmendu di più tarritoria chè u so avvirsariu è piddènduli i so petri.
I règuli sò sèmplici ma u nùmaru di cumbinazioni pussìbuli ni faci un ghjocu cumplessu. Cù 19 ligni virticali è 19 urizuntali, ci hè 361 cruciaturi è u sciffru di i pusizioni pussìbuli hè cunsidarèvuli : 1 cù 170 zera daretu… Pà i scacca u sciffru di i pusizioni pussìbuli ùn hè chè di 1 cù « solu » 47 zera daretu…
Pà un urdinatori hè dunqua diffìciuli di riescia à calculà tutti i pussibilità. Ma pà un urdinatori u prublema principali veni da u fattu ch’eddu hè diffìciuli di priveda u colpu chì sarà ghjucatu.
È puri, Google hà cuncipitu un prugrammu, AlphaGo, chì l’hà pirmissu di vincia (di maghju scorsu)… trè volti… u chinesu Ke Jie, campionu di u mondu !
Postu chì ‘ssa sfida hè stata rillivata, oramai, a squatra di ricerca daretu à AlphaGo hà annunciatu cunsacrà a so inirgìa à u sviluppu d’algurìtimi par risolva prublema maiori chì tòccani l’umanità. Par Google, Alpha Go ùn hè chè u principiu d’un prugettu maiori. Si tratta d’aduprà a putenza d’AlphaGo par aiutà à cumbatta certi malatìi, à riducia a cunsumazioni d’inirgìa o ancu à crià matiriali novi… Google voli fà crescia, cù a Intilligenza Artificiali, i capacità di l’èssaru umanu.
#AlphaGo #JeudeGo #AIGoGoogle
Ritrattu : https://pixabay.com/fr/photos/?q=jeu+de+go&hp=&image_type=&cat=&min_width=&min_height=
U Sciintificuchju 