Artìculu Facebook di u 14/06/17
U gràfinu (o graffenu) hè u strattu u più finu di u gràfitu (o graffitu), u custituanti principali di i mini di criò. Da mori era cunnisciutu ma ci hè vulsutu à aspittà 2004 par ch’eddu sighi isulatu. Hè cumpostu di carbonu puru è si prisenta sottu à a forma di fuglietta d’atoma di carbonu chì pàrini un grigliasgiu.
U gràfinu si pò truvà in a natura in i mini di gràfitu di Madagascaru o di u Brasilu. Pò ancu essa sintitizatu à parta da u gasu di mèttanu o da u gasu d’acitilenu.
Hè un matiriali flissìbuli, lepiu, ultrarisistenti, trasparenti è cunduttori lèttricu pirfurmanti. Hè a somma di tutti ‘ssi qualità chì ni faci un cumpunenti ùnicu chì prumetti a rializazioni di mori affari :
– di screna piigatoghja di i tilèfuni purtativi.
– di battarìi prestu caricati.
– di ciarredda capaci di caccià u sali da l’acqua di u mari.
– di tirapìi contru à u càncaru.
Sò dighjà unipochi d’anni avà chì u gràfinu hè annunciatu com’è un matiriali miràculu è puri ùn faci ancu parti di u nosciu cutidianu. Intantu, più và è più i so qualità sò capiti, ma d’appressu à certi spicialisti, ci vularà à aspittà quantunqua dinò una dicina d’anni nanzi di truvà mori prudutta à nantu à u marcatu.
Ma otantu, sempri d’appressu à certi spicialisti, mancu da quì à deci anni u gràfinu avarà impiutu u nosciu cutidianu. Micca chì a ricerca intornu à u gràfinu ùn avarà avanzatu ma piuttostu parchì da quì à tandu si sarà pò essa trovu un mitariali ancu meddu…
#graphene #grafeno #écransouple #softscreen #ultraconductive
Ritrattu : https://pixabay.com/en/graphene-graphite-benzene-chemistry-161773/
U Sciintificuchju 