Ray Kurzweil, infurmatizianu, invintadori è futuròlugu, oghji impiigatu da Google, hè cunsidaratu com’è u maestru à pinsà attuali di u Transumanìsimu. U Transumanìsimu hè un muvimentu d’idei, duvintatu intirnaziunali è natu in l’anni 60a in California. Affirma chì i ticnulugìi novi sò una uccasioni par cambià a natura umana è ancu a noscia cundizioni di murtali.
À nantu à i numarosi pridizzioni fatta da Ray Kruzweil vi prupunimu di scòprani deci :
2020 : L’urdinatori parsunali sarani di listessa putenza ch’un ciarbeddu umanu.
2028 : L’inirgìa di u soli sarà à bon pattu è spartuta par suddisfà i bisogna di tutta l’umanità.
2031 : Sarà cumunu in i spidali l’usu di i stampatrici 3D par fà novi òrgani umani.
2033 : I vitturi senza cunduttori duvintarani a norma.
2036 : Pudarani essa riprugrammati i cèdduli par varriscia i malatìi.
2040 : Sarani intrudutti gaggetta in l’urganìsimu umanu à cumincià pà i sistema di ricerca chì d’altrondi viaghjarani cù u pinsamentu è i so risultata sarani affissati à nantu à lintichji in l’ochja o à nantu à spichjetti.
2042 : Si pudarà essa immurtali cù l’usu d’una armata di nanurubota ch’ani da cumplittà u sistema umanitariu è nità l’urganìsimu da i malatìi.
2044 : A intilligenzach’ùn hè biulògica sarà milarda di volti più intilligenti chè a intilligenza umana.
2045 : Affacca a singularità ticnulògica*. A tarra duventa tamantu urdinatori.
2099 : U prucidimentu di singularità ticnulògica si sparghji à nantu à l’universu sanu.
*Singularità ticnulògica : i transumanisti crèdini in a singularità ticnulògica chì voli chì l’ivuluzioni di a ticnulugìa sighi spunanziali è finischi par tuccà un niveddu chì l’omu ùn pò mancu imaginà. U cuncettu di singularità hè liatu à quiddu di a cunvirgenza NBIC, veni à dì cunvirgenzi di i Nanuticnulugìi, di i Biuticnulugìi, di a Intilligenza artificiali è di i scienzi Cugnitivi. Tutti l’avanzati in ‘ssi diffarenti disciplini si prufìttani l’uni à l’altri è tandu s’accilirèghjani l’avanzati…
#PredictionsRayKurzweil #TechnologicalSingularity #Transhumanism
Da leghja : https://iatranshumanisme.com/2015/04/25/les-nouvelles-predictions-de-ray-kurzweil-lavenir-dici-2099/
http://www.01net.com/actualites/le-transhumanisme-en-cinq-questions-632903.html
Ritrattu : https://pixabay.com/en/binary-tunnel-blue-technology-2120453/
U Sciintificuchju 