– usciintificuchju.com – Dumènica u 15 d’uttrovi 2017
Si tratta d’un prupulsori lèttricu ch’è no pudarìami qualificà di màgicu vistu ch’eddu hè cuncipitu par pruducia una catapughjata senza carburanti. Tuttu u cuntrariu di i mutori abituali (veda u ritrattu).
A mascina si prisenta com’è una scàtula cònica cù drentu micruondi chì si riflèttini à nantu à placchi. A forza chì veni da u drentu devi riescia à prupuslà l’ugettu com’è sì a forza u puntaia da u fora… Hè una vera sfida à i leci di a fìsica.
‘Ssu cuncettu hè statu prupostu in u 2001 da unu inginieri britànicu, Roger Shawyer. Hà sùpitu intarissatu a NASA vistu ch’eddu aiutarìa à u viaghju spaziali pirmittendu di rializà longhi distenzi à una vitezza strasurdinaria. Senza carburanti di sicuru ci hè icunumìa di massa ciò chì cuntribuisci à fà crescia a vitezza. Ci hè quantunqua bisognu d’una surghjenti di littricità chì panedda sulari poni furnì.
In u 2015 è in u 2016 travadda finanzati da a NASA ani pirmissu di fà provi cuncluendu chì ‘ssu tippu di prupulsori viaghjaia. L’ondi imissi in u mutori è chì ribòmbani drentu prucùrani una puntata. ‘Ssa puntata hè chjuculedda è mancu a pudarìami risenta. Ma asisti. Hè stata arrigistrata da i strumenta sciintìfichi.
U prublema hè chì nimu par avà riesci à spiigà ‘ssa forza mistiriosa.
Pocu fà ancu circadori chinesi ani annunciatu d’avè rializatu u so pròpriu sistema chì viaghja. S’aspetta una cunfirmazioni ufficiali da u guvernu chì dipoi 2010 invistisci mori solda.
U fattu si stà ch’eddi sò parechji à creda in ‘ssa pussibilità. S’edda hè ammaistrata ‘ssa forza littrumagnètica sarìa una vera rivuluzioni. Tandu andà à nantu à Marzu, inveci di 10 mesa, piddarìa 70 ghjorna ! Solu 4 ori bastarìani par andà à nantu à a luna. L’omu chjucu à pettu à l’imminsità di l’universu riisciarìa quì à mèttasi omancu à a misura di u sistema sularu !…
#EMDrive #PropulsionElectromagnétique
http://www.journaldugeek.com/2016/11/23/cest-confirme-le-propulseur-emdrive-fonctionne-bien-mais-il-est-loin-detre-utilisable-en-conditions-reelles/
Ritrattu : https://pixabay.com/en/rocket-propulsion-engine-usa-nasa-516046/
U Sciintificuchju 