CÙ U RISCALDAMENTU È I PISTICIDA, U NÙMARU DI L’ABI CUNTINUEGHJA À SPRUFUNDÀ !

– usciintificuchju.com – Sàpatu u 21 d’uttrovi 2017

Faci 20 anni avà ch’eddi càlani i culunìi di l’abi. Hà cumenciu in a Mèrica è dopu hà toccu l’Auropa. Hè un prublema pà a filiera di l’apicultori ma al di là sò iquilìbria naturali chì sò minacciati postu chì l’abi ùn fabrichèghjani micca solu u meli, ma nanzi à tuttu sò rispunsèvuli di a pullinizazioni di i fiora…

Sò parechji i insetta à intarvena in a pullinizazioni di i fiora ma u rolu di l’abi hè primurdiali. Andendu à circà u nèttaru in u fondu d’inghji fiori l’abi tòccani l’òrgani ripruduttori di i pianti. Hè cussì ch’eddi trasfirìscini l’àmacu d’un fiori à l’altru. Veni à dì ch’eddi pirmèttini à a granedda masciu (l’àmacu) di ficcassi in u pistillu (a parti fèmina di a pianta).

U prublema veni da i pisticida. Aduprati par luttà contru à i insetta chì attàccani liguma è frutta… tòmbani ancu l’abi ! Certi mulèculi sò intarditti dipoi 2013 è puri si ritròvani tracci di pisticida nucivi par l’abi in 75% di u meli rializatu in u mondu. Sò quantità mìnimi par l’Omu ma chì bàstani par disturbà u sistema narbosu di l’abi chì dopu ùn sò più capaci di vultà à u bugnu.

Cù i pisticida u prìculu hè maiori par l’abi ma ùn hè u solu. Si poni aghjustà i calafrona asiàtichi, i parasita minùsculi, i malatìi è… u riscaldamentu climàticu. Cù u caldu sò disturbati i cìcula di u fiuriscia di i pianti, ciò chì cuntribuisci à disturbà l’attività di l’abi è di i so rigini chì quand’edda hè indibbulita a ricolta d’àmacu poni avè u riflessu di fà menu ova… Tuttu s’incatineghja par fà calà u nùmaru di l’abi. I foca di furesti o i timpesti chì distrùghjini i bugna accintuèghjni di sicuru u finòminu.

Tandu sì l’abi ùn sò più boni à assicurà a pullinizazioni sò parechji spezii di ropa bona à manghjà chì sò minacciati : pumati, zucchi, fràvuli, amànduli, noci… Senza abi ùn ci sarìa più nè caffè nè cicculata… L’abi intarvènini in u terzu di l’alimantazioni mundiali.

I DRONA PAR RIMPIAZZÀ L’ABI !

Hè una suluzioni chì i circadori giapunesi ani prupostu dipoi stu inguernu 2017. A tinnulugìa pò ghjunghja quì à luttà pà a prisirvazioni di a biudivirsità vigitali postu chì i drona farìani u tavaddu di pullinizazioni di l’abi. Sarìa dighjà una bona, ma par disgrazia ùn si tratta di parà a disparizioni di i culunìi d’abi. U dronu pullinizatori hè un quadricòttaru tilicumandatu miniaturizatu. Hè capaci di codda l’àmacu à nantu à a parti masciu d’un fiori po di pònala à nantu à a parti fèmina. Sottu à u corpu di ‘ssa mascina minuruchja i sciintìfichi ani ficcatu pela di cavadda par ripruducia i filamenta chì còprini i zampi di l’abi. Unti d’un gelu iònicu i pela uffrìani tandu una prupriità adisiva.

Intantu, i drona par avali ùn sò ifficaci quant’è l’abi stessi è ùn sò ancu autònumi. A ricerca cunsisti dunqua à rèndali pù pirfurmanti è à dutalli d’una intilligenza artificiali chì li pirmittarìa di sbrugliassi da par eddi.

À menu chì d’altri circadori truvèssini una suluzioni par aiutà l’abi à cuntinuà à campà à nantu à a Tarra, eddi ch’èrani quì 80 miliona d’anni fà, beddu nanzi à l’affaccata di i prima òmini.

#RéchauffementClimatique #Insecticides #DéclinAbeilles #GlobalWarming #Insecticides #DeclineBees

Da leghja : http://www.actualites-du-jour.eu/article/abeilles-la-meteo-et-les-pesticides-hatent-leur-nbsp-declin/2845624

http://www.huffingtonpost.fr/henri-clement/abeilles-bouleversement-climatiques_b_7560750.html

http://www.futura-sciences.com/tech/actualites/drone-drones-remplacer-abeilles-66273/

Ritrattu : https://pixabay.com/en/bees-pollination-insect-macro-work-18192/

Laisser un commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion /  Changer )

Photo Google+

Vous commentez à l'aide de votre compte Google+. Déconnexion /  Changer )

Image Twitter

Vous commentez à l'aide de votre compte Twitter. Déconnexion /  Changer )

Photo Facebook

Vous commentez à l'aide de votre compte Facebook. Déconnexion /  Changer )

w

Connexion à %s