– usciintificuchju.com – Vènnari u 1a di dicembri 2017
A impresa Boston Dynamics avìa dighjà imprissiunatu à tutti muscendu in una videò, u so robò Atlas capaci di marchjà solu, com’è un èssaru umanu, à mezu à i petri o à mezu à a nevi. Pocu fà, in ‘ssu mesi di nuvembri 2017, una antra videò hè stata publicata è drentu si[ML1] vedi à Atlas saltà d’un ustàculu à l’altru par compia à a fini par un saltu in daretu, ricaschendu à nantu à i so peda ! Imprissiunanti : si cumporta tali unu spurtivu.
Boston Dynamics (situata in u Statu amiricanu di u Massachusetts) era stata compra in u 2013 da Google. Po in u 2017 hè stata dinò ripresa da u gruppu giapunesu Softbank. Mai ci dà infurmazioni tènnichi à nantu à i capacità di u so robò. Intantu tuttu inghjunu pò fà u custatu chì tutti i volti, è in pocu tempu, i prugressa sò cunsidarèvuli (in u 2015, era sempri liatu à un cablu è avìa u pedi menu sicuru…).
Hè sicura chì Boston Dynamics hè una rifarenza in ‘ssu dumuniu di a rubòttica, sopra à tuttu chì Atlas ùn hè a so sola rializazioni. Frà altru, ci hè u ghjàcaru robò SpotMini, beddu lestru ; ci hè Big Dog, una vera mula chì pò purtà più di 50 chilò è capaci di marchjà o di corra sola parechji ori è nantu à tarrena diffìciuli ; ci hè Handle u robò cù dui roti capaci di saltà à più d’un metru d’altu è chì si dispiazza prestu ; o dinò ci hè San Flea, u robò chjucu fattu guasgi di solu quattru roti è capaci di saltà à… 9 m d’altu à nantu à i tetta di i casi…
Intantu, par avà, a impresa ùn hà ancu rializatu un pruduttu cummircializatu è chì si ritruvarìa in vèndita par tutti drentu à butteghi o chì sarìa adupratu in u mondu industriali o ancu militari…
Boston Dynamics ùn manca di putanzialità. Basta à falli sbuccà à nantu à prudutta d’usa cuncretti. À U Sciintificuchju ci pari diffìciuli d’imaginà chì tutti ‘ssi invinzioni sìghini stati fatti indarru…
http://www.clubic.com/video/actualite/video-le-robot-atlas-de-boston-dynamics-progresse-encore-en-matiere-de-gestion-de-l-equilibre-491164.html
Ritrattu : https://www.youtube.com/watch?v=fRj34o4hN4I
U Sciintificuchju 