– usciintificuchju.com – Marti u 26 di dicembri 2017
L’annunciu hè statu fattu u 4 di dicembri da Donald Trump, in Salt Lake City, a capitali di l’Utah. Conta di riducia a suparficìa di dui zoni prutetti. Una sarà ridutta di 85 % è l’altra di mità. Si tratta di u tarritoriu di l’indiani Navarò indu’ si scòntrani i ghjargalona rossi.
U parcu smizatu era statu eddu prutettu in u 2016 da Barack Obama chì rispundìa tandu à una dumanda di l’indiani. Ùn era a vulintà di i Ripublicani di u locu chì ni vòlini fà una splutazioni icunòmica. Cù ‘ssa dicisioni di diclassificallu Donald Trump faci piaceri à i so sustena lucali.
L’amirindiani còntani eddi di bàttasi par uppònasi à ‘ssa dicisioni. Cussì dicìa Russell Begaye, u prisidenti di a Nazioni Navarò ramintendu chì u guvernu amiricanu avìa dighjà presu miliona d’èttari di a tarra di u so pòpulu…
Intantu a battaglia duvarìa essa ghjudiziaria. Ùn hè a prima volta ch’un Parcu hè diminuitu ma mai a dicisioni era stata attaccata davanti à i tribunali. Si tratta di sapè sì l’anzianu Trattatu di Tiudoru Roosevelt chì dipoi 1906 dà puderi à u prisidenti amiricanu di pruteghja i sita d’intaressu sciintìficu è stòricu, li dà ancu u puderi di vultà in daretu. Tandu s’eddu perdi Trump, u caràttaru pirmanenti di i fruntieri di i zoni prutetti ni sarà rinfurzatu. À u cuntrariu, s’eddu vinci i sita prutetti pirdarani di u so caràttaru sacru dendu u sìntimu chì sempri i fruntieri poni essa rimissi in càusa.
Ritrattu : https://pixabay.com/en/bryce-canyon-national-park-utah-2263367/
U Sciintificuchju 