– usciintificuchju.com – Vènnari u 26 di ghjinnaghju 2018
Hè Robert Schmittner, spiliòlugu alimanu, spicialistu di i sàpari sottumarini chì hà scupartu cù a so squatra a sàpara a più maiori di u mondu, à u Mèssicu ind’eddu hè stallatu.
Ciuttati sottu à l’acqua, l’òmini ani trovu passaghja à mezu à dui sàpari, quidda di Sac Actun è quidda di Dos Ojos. Aduniti fòrmani una reta immensa di 347 chilòmitri chì trapassa a sàpara di Ox Bel Ha chì nanzi, cù i so 269 chilòmitri, custituìa a sàpara a più maiori.
Oramai l’unioni di Dos Ojos (83,7 chilòmitri) è di Sac Actun (262 chilòmitri) hè chjamata simpliciamenti Sac Actun.
Robert Schmittner hè cunvintu eddu chì Sac Actun hè riliatu cù parechji altri sistema sottumarini di a pinìsula di Yucatán è conta bè di cuntinuà i so ricerchi.
D’UNU INTARESSU ARCHIULÒGICU MAIORI
Al di là di i diminsioni chì sò strasurdinarii, ‘ssi tunella sottacqua sò d’una ricchezza maiori par l’archiòlughi chì ci poni truvà vistica d’èssari umani o ancu d’animali è di pianti oghji spariti è dinò tracci di a cultura maya. Pà i discindenti di ‘ssu pòpulu, i pozza d’acqua chì ci hè in ‘ssa reta sò bocchi chì li pirmittìani di cuminicà cù i dìa di i monda sottitarra.
Hè sicuru ch’in più di ‘ssi tisora archiulògichi ‘ssi loca sò impurtanti pà a biudivarsità cù tutti i spezii animali è vigitali chì si poni truvà drentu è in fini sò impurtanti pà a riserva d’acqua ch’eddi poni custituì.
Ritrattu : https://pixabay.com/fr/cenote-grotte-mexique-yucatan-2299636/
U Sciintificuchju 