– usciintificuchju.com – Vènnari u 23 di frivaghju 2018
D’appressu à unu studiu di sciintìfichi autraliani, publicatu in u ghjurnali The Lancet Child & Adolescent Health, i moda di vita avendu cambiatu, hè cambiatu dinò u pirìudu di l’aduliscenza : si stendi oramai da 10 à 24 anni, par vìa ch’è no studiemu di più tempu, ch’è no femu fiddoli più tardi è ch’eddu hè più cumplicatu par uttena a so indipindenza finanziaria.
À pettu à a difinizioni abituali chì situaia l’aduliscenza da 14 à 19 anni, l’allungamentu hè impurtanti.
Pà i circadori i cambiamenta sucitali ùn sò chè una parti di a spiigazioni. Hè stata pruvata, a curpuratura si sviluppa più prestu chè nanzi grazia à un niveddu di vita più bonu, in leia cù una alimantazioni più quantitativa.
Hè cussì chì a pubartà si manifisteghja più prestu. Dinò a parsona è u ciarbeddu cuntinuèghjani à sviluppassi beddu dopu à 18 anni. Par asempiu, in parechji casi, i denti di u ghjudiziu èscini cumplittamenti solu versu 25 anni.
Da nutà, chì à a priistodia, i règuli di i fèmini affaccàiani da 7 à 13 anni. Ancu più à bona ora chè avà dunqua. Ma sta volta era par d’altri raghjoni. Era parchì si duvìani ripruducia in furia vistu chì a so spirenza di vita era dèbbuli.
Intantu, oghji, quand’eddu si stendi u cuncettu d’aduliscenza à nantu à 14 anni (da 10 à 24), a dìcini certi sperti, ci hè u rìsicu d’infantilizà ghjuvanotti è ghjuvanetti. Hè sicura chì al di là di a biulugìa, a màghjina ch’è no li rinviemu d’eddi hè impurtanti è cuntribuisci à accuncialli…
Da leghja : http://www.leprogres.fr/france-monde/2018/01/23/l-adolescence-se-termine-desormais-a-24-ans
https://www.sciencesetavenir.fr/sante/nous-serions-maintenant-adolescents-de-10-a-24-ans_120089
Ritrattu : https://pixabay.com/fr/%EE%A4%92-silhouette-l-universit%C3%A9-%C3%A9tudiants-3105485/
U Sciintificuchju 