– usciintificuchju.com – Sàpatu u 3 di marzu 2018
A Mèrica Suprana hà cunnisciutu timpiraturi più chè bassi è nivona strasurdinarii, in Alascà hè falata dui volti di più di nevi chè d’abitùdina è in Filanda di ghjinnaghju ci sò stati ghjurnati cù menu 40 grada. Ultimamenti, in Auropa di u Punenti è ancu in Còrsica sò dinò calati i timpiraturi sottu à zeru è hà nivatu mori (veda u ritrattu presu vicinu à u paesu di Conca).
Or tuttu ‘ssu fretu hè spiigatu da i sciintìfichi cù… u riscaldamentu !
Hè a crèscita di i timpiraturi à i pola chì pruvucheghja un dirigulamentu di u Jet Stream chì eddu ci porta una aria fresca.
A pianeta, si sà, si riscalda è ghjè a cunsiquenza di l’attività umana. Di manera ginirali ci hè una crèscita d’1°C. Or in Àrticu a crèscita hè ancu più alta. Quistu annu à u polu Nordu a timpiratura hà avvicinatu u zeru, veni à dì ch’è no èrami 30 grada sopra à i nurmali di staghjoni. Tandu scugni a banchisa chì à ‘ssu rìtimu duvarìa sparì da quì à mancu trenta anni, sigondu à certi sperti. A sdrughjera di i ghjacciaghja cunducendu di sicuru à alzà u niveddu di u mari.
U Jet Stream disigneghja u currenti di venta chì circuleghja da mezu à i pola ghjilati è i tròpichi è l’iquatori chì sò caldi. Venta chì si fìccani dinò da mezu à i zoni vicini à a tarra, riscaldèndusi à u so cuntattu, è i zoni più alti di a trupòsfara. Hè un buleghju cumplessu chì di règula manteni un iquilìbriu da u fretu à u caldu. Or ‘ssu iquilìbriu hè in traccia di ròmpasi cù a crèscita di i timpiraturi in Àrticu. ‘Ssu finòminu cunduci tandu u Jet Stream à distèndasi. Menu dirizziunali duventa più sinuosu purtendu ancu ind’è no una aria fresca…
Da nutà chì a rinfrischera di l’Auropa pò essa impighjurita da un antru dirigulamentu, sempri à càusa di u riscaldamentu, è chì sta volta tuccarìa u Gulf Stream. Si tratta quì di a circulazioni di i currenti marini. Una acqua calda ricodda da i Caraibi versu u Nordu è scontra una acqua ghjilata chì di règula li passa sottu. Or, quand’eddu scugni u ghjacciu diminuisci a salinità di l’acqua di u mari. Tandu, l’acqua scunta è ghjilata chì t’hà una dinsità più dèbbuli, ùn fala più sottu à l’acqua calda. Cussì si pianta a circulazioni di i currenti è l’acqua di i Caraibi ùn s’affacca più par riscaldà i costi di l’Auropa…
Hè sicura ch’è no manchemu di rinculu par avè a cirtezza chì tutti i dirigulamenta custatati sò u fruttu di u riscaldamentu. Intantu sò numarosi i sciintìfichi à pinsalla è parechji sò dinò à pinsà chì l’Auropa s’appronta à entra in un pirìudu di rinfrischera maiori.
Da leghja : http://sciencepost.fr/2017/05/gulf-stream-temperatures-seront-plus-basses-cet-ete/
Ritrattu : U Sciintificuchju
U Sciintificuchju 