– usciintificuchju.com – Sàpatu u 21 di luddu 2018
Circadori amiricani ani annunciatu ch’eddi t’ani cuncipitu un mischiu duru quant’è u scudu di u famosu parsonaghju di figuretti di scienzi finzioni, Captain America…
Si tratta di circadori di l’univarsità di u Texas Supranu. U mischiu missu à u puntu hè da veru risistenti. Pò essa micca com’è quiddu di u scudu di l’aroiu di figuretti amiricanu ma a so durezza pari quantunqua d’un altu niveddu.
A fòrmula par ghjunghja à un matiriali cussì duru hè u risultatu d’un buleghju di parechji ilimenta tutti sdrutti à u listessu tempu : u cromu, u cubaltu, u farru, u manganesu è u siliciu. Par riescia ‘ssu bulighjumu ci hè bisognu di rializà una strufinera intensa po d’impastà. Hè un mètudu chì cunduci à a rializazioni d’un mischiu d’alta antrupìa (funzioni chì carattirizeghja a crèscita di un disòrdini in un sistema è a digradazioni di l’inirgìa).
Dopu à ‘ssa scuparta i circadori riflèttini à comu dà un usu cumirciali à ‘ssu matiriali… vistu chì par avà, ‘ssu mischiu costa beddu troppu caru… Hè vera chì una tonna di farru costa menu di 60€, inveci ch’una tonna di cubaltu (unu di i ingridienti di u mischiu) costa à pocu pressu 70 000€ !…
Ritrattu : https://pixabay.com/fr/captain-america-bande-dessin%C3%A9e-1293949/
U Sciintificuchju 