PARADOSSU DI FERMI È IQUAZIONI DI DRAKE

– usciintificuchju.com – Dumènica u 7 d’uttrovi 2018

Dipoi parechji anni di modu cuntìnuu sò trovi strapianeti è numarosi sò ghjudicati abbitèvuli, sigondu à i criteria chì sò i nosci (una atimòsfara in capacità di mantena una acqua lìquida). Intantu d’avè i meza par andà à stallassi à nantu, d’altri spezii intilligenti avarìani pussutu sviluppassi, ma tracci d’altri civilizazioni ùn sò arrigistrati par avali… In tuttu l’Universu, sò miliarda d’altri monda vivi è intilligenti chì si pudarìani truvà. È puri, pari ch’è so sìghimi sempri soli…

‘Ssa riflissioni ci rinvìa à ciò chì si chjama u Paradossu di Fermi. Enrico Fermi, fìsicu d’urìcini taliana è naturalizatu amiricanu, hà avutu u premiu Nobel in u 1938 pà i so travadda à nantu à i niutrona. In u 1950 inveci ch’eddu chjachjareghja cù amichi è culleghi à l’uccasioni d’unu ripastu, ni veni à fà una dumanda chì firmarà sottu à u nomu di Paradossu di Fermi. Si tratta di sapè parchì l’umanità, ùn hà ancu trovu a traccia di civilizazioni stratarrestri, inveci chì u soli hè beddu più ghjòvanu chè parechji altri steddi di a noscia galassìa. D’appressu à Fermi ‘ssi civilzazioni duvarìani essa più avanzati chè a noscia è da a Tarra si sarìa pussutu arrigistrà una tistimunianza com’è ondi radiò par asempiu. Par fà cortu, u Paradossu di Fermi si pudarìa inuncià cussì : « S’eddi asistìani civilizazioni stratarresti, si sarìani dighjà affaccati ind’è no. Tandu, indu’ sò ? ».

Di sicuru sò numarosi quiddi ch’ani raghjunatu à nantu à ‘ssa quistioni è numarosi pruposti sò fatti par spiigà ‘ssu pardossu. Frà altru, si pò ritena :

. Quiddi chì pènsani ch’è no semu soli parchì addunì i cundizioni nicissarii à a criazioni di un mondu com’è u nosciu hè troppu iccizziunali par accada dui volti…

. Quiddi chì pènsani ch’eddi asìstini i stratarrestri ma ch’ùn ci vòlini scuntrà parchì ci ghjudichèghjani pocu intarissanti o ancu priculosi…

. Quiddi chì pènsani chì d’altri civilizazioni si sò sviluppati ma ùn ani avutu u tempu di scuntracci parchì sò stati distrutti nanzi da un finòminu còsmicu o dopu à una verra intarstiddaria…

Intantu, in u 1961, Frank Drake, astrònumu amiricanu, hà prupostu una iquazioni par pudè stimà u nùmaru pussìbuli di civilizazioni drentu à a noscia galassìa (è più indà par istrapulazioni). In ‘ssa iquazioni N, u nùmaru di civilizazioni stratarrestri hè u pruduttu di setti fattori : u nùmaru di steddi in furmazioni tutti l’anni ; u nùmaru di steddi cù pianeti à l’intornu ; u nùmaru di pianeti chì pudarìani accodda a vita ; a parti di i pianeti indu’ ci hè da veru a vita ; a parti di ‘ssi pianeti indu’ a vita affaccata hè intilligenti ; a parti di i pianeti indu’ ‘ssi stratarrestri intilligenti ani a capacità è a vulintà di cuminicà ; u tempu mizanu di vita d’una civilizazioni. Hè sicura chì u risultatu di ‘ssa iquazioni ùn hè ch’una stimazioni. Sigondu i nùmari scelti pà i diffarenti fattori, N pò essa più chjucu chè unu è tandu vurrìa dì ch’è no semu i soli èssari cù una tinnulugìa avanzata in a galassìa, o allora N à u cuntrariu pò essa maiori dimustrendu chì ci sò millai è millai d’altri civilizazioni. U fattu si stà chì s’è no mittimu valori plausìbuli par tutti i diffarenti paràmitri, u valori di N hè sempri beddu supiriori à 1, prova chì ùn duvarìami micca essa soli in l’Universu… D’altrondi hè ‘ssu risultatu chì à parti di l’anni sissanta hà mutivatu circadori è guverna à traversu u mondu par metta in piazza prugramma di ricerchi à nantu à una vita stratarrestra.

Da leghja : https://fr.wikipedia.org/wiki/Paradoxe_de_Fermi

https://sciencetonnante.wordpress.com/2012/10/22/lequation-de-drake/

Ritrattu : https://pixabay.com/fr/ufo-extraterrestre-vaisseau-spatial-782655/

Laisser un commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion /  Changer )

Photo Google+

Vous commentez à l'aide de votre compte Google+. Déconnexion /  Changer )

Image Twitter

Vous commentez à l'aide de votre compte Twitter. Déconnexion /  Changer )

Photo Facebook

Vous commentez à l'aide de votre compte Facebook. Déconnexion /  Changer )

Connexion à %s