Auteur : usciintificuchju

Artìculu Facebook di u 16/03/17

A squatra di u biuticnulugistu amiricanu John Craig Venter, hà criatu di modu artificiali una battirìa cù solu i 473 gena nicissarii à a vita (in paragonu, u ginomu di l’omu cunteni à pocu pressu 30 000 gena). Or ‘ssu tippu di micruurganìsimi rializatu in laburatoriu pudarìa intaragì cù u sistema imunitariu umanu o ancu attaccà i cèdduli chì dani u càncaru.

‘Ssa biulugìa di sìntasi pò iffittivamenti circà di rializà midicini sopra misura, adattati à u ginomu è à u micrubiomu di inghjunu. Si pò circà dinò di crià battirìi chì eddi ani da luttà contru à i battirìi chì si musciàiani in capacità di risista à l’antibiòtichi. Un micruurganìsimu artificiali pò ancu serva à a ditizzioni di malatìi rinviendu un signali spicìficu una volta intrudutu in l’urganìsimu. Certi battirìi pudarìani essa criati par intrudùciasi drentu à i tumori par pudè distrùghjali. In fini, di sicuru, i cèdduli artificiali òffrini a pussibilità di crià òrgani sigondu i dumandi pà i transplantazioni…

#CellulesArtificielles #ArtificialCell

Da leghja : https://www.sciencesetavenir.fr/sante/cellules-artificielles-4-applications-medicales-innovantes_111182

Ritrattu : https://pixabay.com/en/photos/?image_type=&cat=&min_width=&min_height=&q=cellule+artificielle&order=popular

Artìculu Facebook di u 05/03/17

Un gruppu di circadori di l’Univarsità amiricana d’Harvard hà annunciatu ch’eddu era à nantu à u puntu di fà rinascia un mammuttu lanosu. Si sèrvini di i infurmazioni ginètichi ritrovi drentu à animali cunghjilati è bè cunsirvati in a tundra di Russìa. Ni vòlini tandu prufittà par ficundà cù ‘ssu ADN di mammuttu, una alifanti chì dopu darà a nàscita à un alifantimammuttu…

#MammouthRéssuscité #MammothRessurrected

Da leghja : http://www.laterredufutur.com/accueil/dici-2-ans-un-mammouth-laineux-reviendra-a-la-vie/

Ritrattu : https://pixabay.com/en/sculpture-animal-sculpture-1679722/

Artìculu Facebook di u 28/02/17

Ci sò prugetta nati in u 2015 o in u 1016. Si n’aspetta nutizii freschi, intantu ramintemu qualessi èrani :

1. Ci hè u prugettu di a sucità MHOX. I so cuncipitori ani imaginatu un globu uculariu chì pirmittarìa di fà crescia a visioni passendu à 15/10. Si pudarìa dicida di veda in culori, in neru è biancu o di pruvà parechji altri spettra culuriti. Si pudarà fà un zoom, veda di notti o imbrancassi cù internet (par vìa d’una pulgia wifi stallata à nantu à u narbu òtticu).

Da leghja : https://iatranshumanisme.com/2015/04/25/un-projet-doeil-bionique-qui-pourrait-faire-basculer-lhumanite-dans-le-transhumanisme/

2. Google hà rimissu un brivettu di una vitricedda pà a vista (lintichja di cuntattu) particulari, cù cumpunenti varii : cattadori di battarìa, di radiò, di accatamalzera… Hè sottu à a forma d’un lìquidu chì si metti in l’ochji è chì ni pidda a forma dopu, sicchendu. Pirmittarà d’ammiddurà a vista è ancu di mèttasi in cunnizzioni cù apparechja par dispona d’infurmazioni in u so campu di visioni (infurmazioni GPS, piddà ritratta, veda a notti…).

Da leghja : http://www.europe1.fr/emissions/innovation/la-lentille-connectee-a-injecter-dans-loeil-2735281

3. Ci hè a lintichja Ocumetics Bionic Lens di una sucità canadiana. Hè l’òpara di Dareth Webb un uttumitristu di a pruvincia di Culumbìa Brittànica. Dici chì ni sarà finita di i spichjetti è di i lintichji usuali. ‘Ssa vitricedda duvarìa pirmetta di curreghja tutti i prublema di vista è di crescia i capacità visuali. Par mèttala bàstani 8 minuti è si faci senza anistisìa.

#OeilAugmenté #IncreasedEye

Da leghja : http://www.maxisciences.com/lentille-de-contact/bientot-des-lentilles-de-contact-bioniques-pour-u

Ritrattu : https://pixabay.com/en/eye-pupil-iris-see-eyelashes-lens-597560/

Artìculu Facebook di u 25/02/17

Papilio Hospiton, hè una barabàttula di a famidda di i Papiliunidati. Famidda sparta in u mondu chì conta 570 spezii, chì pà a maiò parti pòrtani una coda à nantu à i so ali di daretu.

A spezia Hospiton hè edda andèmica di a Còrsica è di a Sardegna. I individa sò pochi diffarenti l’uni di l’altri, cacciata a impurtenza di a ripartizioni di u culori neru. Mascia è fèmini dinò sò pochi diffarenti, sì ùn hè chì a fèmina hè più maiori com’è par parechji altri insetta. Si carattarizèghjani frà altru, da codi di l’ali di daretu chì sò corti è da una ala di davanti chì prisenta una banda nera inzicculata.

Si pò cunfonda cù dui spezii vicini prisenti in Còrsica. Cù Papilio Machaon di culori più francu, chì t’hà codi di l’ali dui volti più longhi è cù Iphiclides Podalirius chì t’hà codi di l’ali quattru volti più longhi è un bolu spicìficu postu ch’edda batti pocu l’ali, lachèndusi ariulà.

Pà u più Hospiton si pò ussirvà da 400 à 500 m d’altitùdina, ma dinò si pò truvà in piaghja o in alta muntagna (ancu in fini à 2000 m). Li piàcini i fiora di a machja ma sopra à tuttu quiddu di a fèrula, arba chì cresci in i loca più aparti.

‘Ssa barabàttula soffri da u parasitìsimu d’altri spezii (di tippu moschi) chì cuntaminèghjani u brucu è chì isciarani à a fini, da u bumbuccionu, à a piazza d’Hospiton. A murtalità hè impurtanti è i presi di i cullizziunadori vènini à impighjurì a situazioni, è puri hè una spezia prutetta. I peni attribuiti sò piuttostu siveri : da 300 € d’amandi à trè anni di prighjò.

Allora o beddi quand’e vo u vidareti, cuntintètivi di mirallu…

#PapillonCorseHospiton #CorsicanButterflyHosppiton

Da leghja : a rivista Stantari nùmaru 3

Ritrattu : https://pixabay.com/en/butterfly-flower-corsican-plant-565343/

Postu Facebook di u 23/02/17

Oramai pudareti ritruvà i nutizii d’U Sciintificuchju à nantu à a carta.

U misincu U Tàravu ripiddarà certi di i nosci « Posta » in i so culonni.
U ringraziemu di sicuru è à tutti arricumandemu ‘ssa vechja rivista, chì conta dighjà 272 nùmari.

« U Sciintificuchju » ùn hà eddu chè un mesi d’asistenza è puri cumincemu dighjà à essa bè cunnisciuti (654 abbunati) è a pudemu ancu dì, apprizziati!

Ùn hè ch’un principiu è cuntemu bè d’arradicassi in u paisaghju d’internet è di a pruduzzioni scritta isulana.

Tandu, à tutti vi dimu à prestu par d’altri nutizii è… sciintìfichi

#RevueUTaravuUSciintificuchju

Postu Facebook di u 22/02/17

A NASA veni d’annuncià a scuparta d’un sistema (à 40 annati di lumu da u nosciu) cù 7 strapianeti intornu à a so stedda Trappist-1. Trè di ‘ssi pianeti sò in a zona abitèvuli è poni accodda acqua lìquida à nantu !

#SystèmeSeptPlanètes #SystemSevenPlanets

Artìculu Facebook di u 19/02/17

« A cumunità intirnaziunali devi rializà ch’edda si devi appruntà è à u più prestu à una pandimìa mundiali ».

Cussì hà dittu Bill Gates, fundatori di Microsoft è duvintatu micenu. Era à l’uccasioni di a Cunfarenza di sicurità di Munich.

Piddendu l’asempiu di l’ipidimìa d’Èbula in Àfrica d’u Punenti in 2014 è 2015, l’asempiu di a grippa spagnola di 1918 o u casu d’un virus invintatu da tarruristi, hà ghjudicatu pussìbuli una catastrofa à u niveddu di a pianetta.

« Ch’eddi affacchèssini in a natura o in manu à un tarruristu, l’ipidimiulugisti dìcini ch’un patògenu chì si trasmetti in l’aria è chì si sparghji in furia, pò tumbà 30 miliona di parsoni in mancu un annu »

L’hà spiigatu Bill Gates in ‘ssa riunioni rializata tutti l’anni è chì adunisci i rispunsèvuli di a diplumazìa mundiali.

Dinò hà aghjustatu:

« Hè da veru pussìbuli chì u mondu campessi una ipidemia com’è quista in i 10 o 15 anni chì vènini. Sicurità sanitaria è sicurità intirnaziunali sò liati, s’è no ùn ni tinimu contu, currimu unu rìsicu maiori ».

Tandu Bill Gates hà chjamatu i Stata à invistì in a ricerca par sviluppà tinnulugìi in capacità di metta à u puntu in calchì mesi i prudutta pà una vaccinazioni.

Pò essa chì Bill Gates hà dramatizatu a situazioni par uttena di più impegnu di i guverna in a ricerca midicali è par ch’eddi si primurèssini di a sorti di pòpuli disgraziati. Intantu, ch’eddu sighi fintu o riali u so timori (o un pocu di i dui à tempu)… à  « U Sciintificuchju » dimu chì s’edda hè intesa a so chjama hè forsa ciò chì ci hè di meddu par tutti è più particularamenti pà i pòpuli i più pòvari ch’ani bisognu di i vaccinazioni ancu più chè no parchì senza meza par midicassi.

#PandémieBillGates #PandemicBillGates

Surghjenti : http://www.lapresse.ca/sciences/medecine/201702/18/01-5070883-le-monde-doit-se-preparer-a-une-pandemie-globale-dit-bill-gates.php

Ritrattu : Google image / contamination

Artìculu Facebook di u 17/02/17

Ani cumenciu l’amiricani à a fin’di u XIXu sèculu à fà grattacela (alti di 70 m) cù a vulintà d’affirmà a so putenza, ma dipoi, cù sempri a listessa vodda, mori altri torri (beddi più alti) sò crisciuti in u mondu…

À principiu a corsa à a torra a più alta firmaia sopra à tuttu interna à i Stata Uniti è intali à l’anni sittanta hè stata a torra di Chicago (a Willis Tower di 442m) à essa in cima di a classìfica. Dopu ci sò stati i paesa asiàtichi ch’ani rilanciatu a corsa, po i paesa àrabi si sò missi ancu eddi à idificà torri imprissiunanti è avà ùn màncani à traversu u mondu i prugetta sempri più ambiziosi !

Attualamenti, i 5 torri i più alti (è tutti fatti in ‘ssu principiu di XXIu sèculu) sò :

5. In Shangai (China) : u Shangai World Financial Center cù 492m.

4. In Taipei (Taiwan) : u Taipei 101 cù 509m.

3. In New York (USA) : a One World Trade Center cù 541m.

2. À a Mecca (Arabìa Saùdita) :  l’Abraj Al Bait Towers cù 601m.

1. In Dubai (Amirati Àrabi Uniti) : u Burj Kalifa cù 828m.

Da quì à pocu Dubai duvarìa perda a so prima piazza chì in Arabìa Saùdita si custruisci u Kingdom Tower, chì farà 1001 m. Hè privista ch’edda sighi compia a so custruzzioni pà u 2018. Sarà tandu a torra a più alta d’u mondu, intali à a cuncritizazioni d’altri prugetta… com’è quiddi di francà i 1000 m in Iraccu o à u Giapponu.

Arristèmuci una stonda à nantu à u prugettu giappunesu, simpliciamenti… for’ di norma !Si farìa in Tokyò è sarìa custituitu di parechji torri. Ghjè à mezu chì una torra giganti, a Sky Mile Tower, si drizzarìa par ghjunghja intali à…1700 m d’altura ! Drentu pudarìa accodda 55 000 abitanti. Par suddisfà i bisogna di ‘ssa pupulazioni l’acqua sarìa chjappa in l’atimòsfara à parta da i facciati di l’idifiziu. ‘Ssu casamentu maiuronu è tutti l’altri privisti furmarìani una cità di 500 000 abitanti, rializata à nantu à l’acqua. L’ìsuli artificiali sarìani riliati, frà altru, par vìa d’Hyperloop.

Da nutà ch’unipochi d’anni fà, sempri à u Giapponu era statu publicatu unu studiu chì dimustraia chì l’èssaru umanu hè oramai in capacità di rializà una muntagna di farru… Un grattaceli altu di 4000 m ! Sarìa più altu chè u Monti Fuji. Una tali struttura cuntarìa 800 piana è aggruttarìa 1 000 000 d’abitanti. A so basa farìa 6,5 chilòmitri. In drentu sarìani ricustituiti pezza di natura, cù stesi d’àrburi è stesi d’acqua. Par risolva i prublema d’alimintazioni inargètichi sarìani aduprati cintrali marchjendu cù u soli o cù u ventu. ‘Ssu prugettu « tontu », pudarìa avè un costu di 900 miliarda di dòllari. Ùn hà forsa vucazioni à essa rializatu ma a so cuncipitura stessa hè quantunqua intarissanti in quantu à l’uttimizazioni di i risorsi inargètichi senza pulluzioni o in quantu à a scelta di i matiriali par sustena strutturi maiori. Po quandu si trattarà di custruì duminia d’abitazioni à nantu à d’altri pianetti, ci hè da scumetta chì tutti ‘ssi riflissioni ani da ghjuvà.

4000 m ùn hè ancu par avà, ma più di 1000 m sì… Di règula U Sciintificuchju ni riparlarà dimustrendu tandu chì u chilòmitru hè duvintatu u novu duminiu di ghjocu di l’architetti.

À prestu !

#Gratte-ciel #Skyscraper

Da leghja: http://www.topito.com/top-gratte-ciel-hauts-monde ;  http://bfmbusiness.bfmtv.com/entreprise/un-projet-fou-pour-tokyo-cette-tour-de-1-700-metres-et-55-000-residents-952956.html

http://www.futura-sciences.com/tech/actualites/technologie-projet-fou-million-habitants-tour-4-km-hauteur-12726/

Ritrattu: https://stock.adobe.com/

Artìculu Facebook di u 14/02/17

– In Còrsica :

In Lucciana hè statu scupartu un locu di cultu didicatu à u Dìu Mithra. I mura d’una cappedda è pezza di a so stàtula sò stati ritrovi. Hè riprisintatu à cavaddu d’un torru ch’eddu sacrificheghja par offra à un mondu una riginirazioni.

Hè una cridenza nata in Persa 200 anni nanzi à Cristu è chì si sparghji in u Imperu Rumanu. Dopu, cuncurenti di u Cristianìsimu, sarà intardita à u IV^u sèculu. Era trasmissa di modu urali (senza scritturi sacri) da iniziatu à iniziatu. I nuzioni d’amicizia è di lialtà èrani di primura. Mithra era pupularu ind’è i suldati rumani è ancu i schiavi.

Da leghja : http://www.corsematin.com/article/article/mithra-mariana-a-trouve-son-dieu

Ritrattu : hè u pezzu d’unu ritrattu presu da Serge Ottaviani, cullizzioni Burghese in u Louvre-Lens.

– In Cisghjurdanìa :

Una sàpara nova, hè stata scuparta da univarsitarii israiliani in un à piccu di u disertu di Ghjudea. Ghjè quì chì da 1947 à 1956 sò stati ritrovi i famosi rullò di u mari Mortu. Par disgrazia ‘ssa sàpara nova pari d’essa stata dighjà visitata (com’è ni poni tistimunià mànichi di pioli di l’anni 50a) da latri chì si sò sicuramenti arrupati u so cuntinutu di valori è chì si pudìa rivenda à u marcatu neru. Fèrmani quantunqua mori stuedda in tarra cotta, tutti sciappati, pizzuchja di stofi è sopra à tuttu, un pezzu di cartapècura, di prima abordu senza scrittura ma chì sarà sottumissu à una anàlisi più fina…

Da leghja : https://www.sciencesetavenir.fr/archeo-paleo/archeologie/manuscrits-de-la-mer-morte-une-nouvelle-grotte-decouverte-a-qumran_110468

– À u Brasiliu :

In Amazunìa, figuri giganti è giumètrichi sò stati scuparti. À quandu in forma di chjerchju, à quandu di quatru, à quandu cù un fossu o à quandu rialzati… sò cintinai di chjosi mistiriosi chì i furesti diradichati ani fattu affaccà.  Poni ramintà i famosi figuri di u Perù è di u Chili, ancu s’eddi ùn irriprisèntani micca nè òmini nè animali. I studia cunfìrmani ch’eddi sò l’òpari di pupulazioni priistòrichi. Una prova ch’in fin’ di contu i furesti ditti primarii ùn l’èrani tantu è chì l’òmini di tandu ani impastatu ancu eddi u paisaghju. Intantu, pari chì i pòpuli à l’urìcini di ‘ssi custruzzioni sò spariti, stirpati da i malatìi è rimpiazzati par d’altri. ‘Ssi rializazioni, vechji di 2000 anni, fèrmani un misteri è i circadori ùn sani troppu chì funzioni pudìani avè…

#DécouverteMithra #DicoveryMithra

Da leghja : https://www.sciencesetavenir.fr/archeo-paleo/archeologie/les-enigmatiques-geoglyphes-d-amazonie_110469

Artìculu Facebook di u 10/02/17

L’alghi ani riisciutu à campà in u spaziu, for’ di a stazioni urbitali intirnaziunali.

L’alghi sò stati imbarcati drentu à a stazioni urbitali è dopu sò stati piazzati fora. Avìani par sola prutizzioni un filtru par riducia l’iffettu di i radiazioni.

Si trata d’urganìsimi prisenti d’abitùdina in Nurveghja è in Antàrticu, avvezzi à cundizioni diffìciuli : timpiratura alti di 60 °C, timpiraturi bassi di -25 °C, trasicchera, notti longhi senza futtusìntasi pussìbuli, ricizzioni di mori ultraviuletta…

Partuti di luddu 2014 sò vultati à nantu à a Tarra di luddu 2016. Dopu à parechji mesa i circadori ani pussutu veda ch’eddi ripiddàiani a so crèscita. Era un fattu acquistatu : l’alghi avìani riisciutu à campà in u spaziu.

HÈ PIÙ CHÈ INTARISSANTI PÀ A CULUNIZAZIONI DI MARZU.

‘Ssa scuparta sarà d’un aiutu maiori pà a culunizazioni di antra pianetta com’è Marzu. Sottu à una vitrera pudarani pruducia nutritura è ussigenu.

I sciintìfichi studièghjani dinò i cunsiquenzi à nantu à l’ADN di l’alghi, dopu à ‘ssa   missa in cuntattu cù u biotu intersidirali. Ciò chì s’impara pà ‘ssi pìcculi urganìsimi pò sempri aiutà à capì i mudificazioni pussìbuli à nantu à l’ADN di l’omu…

Da nutà chì a industrìa agrualimintaria s’intaressa dinò à i prupriità di ‘ssi alghi è in fini, chì quiddi chì pènsani chì a vita à nantu à a Tarra hè nata da micruurganìsimi affaccati da u fora, ci vèdini di sicuru un argumentu.

Eccu dunqua una pìccula spirienza, cù urganìsimi minori ma cù cunsiquenzi maiori…

Da suvità…

#AlguesVertesEspace #GreenAlgaeSpace

Da leghja : https://www.sciencesetavenir.fr/espace

Ritrattu : https://stock.adobe.com/fr/search?k=station+orbitale