IBM CONTA DI PRUPONA UN SIRVIZIU « D’INFURMÀTICA QUÀNTICA » UNIVARSALI !

Artìculu Facebook di u 07/04/17

Più putenti chè mai… Più putenti chè tutti l’urdinatori mai invintati… l’urdinatori quànticu ! Faci un pezzu ch’eddu si ni parla ma par avà ùn asisti ancu un urdinatori da veru funziunali è à più forti raghjoni dispunìbuli par tutti.

È puri IBM ci travadda cù l’ambizioni d’annuncià nanzi à a fin’ di l’annata, a missa in piazza d’un sirviziu « d’infurmàtica quàntica » univarsali. Si chjamarà IBM Q è darà, par vìa d’internet è paghendu una tassa, a pussibilità à quiddu chì a voli, d’acceda à l’urdinatori quànticu di a sucità amiricana.

Ramintèmuci chì un urdinatori clàssicu viaghja cù i « bits », veni à dì usendu à quandu 1, à quandu 0 par cudificà a infurmazioni. Inveci chì l’urdinatori quànticu si ghjova di a prupriità quàntica chì offri à l’atomu d’essa in i dui stata di 1 è di 0 à tempu. Si parla tandu di « qubits ». Di sicuru, cù ‘ssi bits quàntichi, l’urdinatori hè beddu più putenti ch’un urdinatori tradiziunali, vistu chì inghji qubit t’hà 3 stata pussìbuli (0,1 è 0-1 è micca solu 2, 0 è 1). Par avà u sistema IBM pirmetti solu di manipulà 5 qbits ma a sucità spera di crescia i so pussibilità in l’annati chì vènini (ghjunghjendu prestu à 50 qbits). Pari da veru cunfidenti vistu ch’edda travadda dighjà à u sviluppu di lugiziali pà un pùblicu largu è ch’ani da pirmetta à tutti d’aduprà a putenza d’un urdinatori quànticu.

Cù una infurmazioni com’è quista si pò imaginà chì in u futuru si cunnisciarà dinò una accilirazioni cunsidarèvuli di l’avanzati ticnulògichi è chì a leci di Moore (dipoi l’anni 60a, tutti i dui anni sò duppiati i capacità di i micruprucissori) oghji à l’arrestu, ripiddarà fiatu… Vultaremu à nantu à ‘ssi nuzioni… À prestu !

#IBMOrdinateurQuantique #QuantumComputer

Da leghja : http://trustmyscience.com/ibm-souhaite-mettre-en-place-le-premier-systeme-universel-d-ordinateurs-quantiques/

Ritrattu : https://pixabay.com/en/photos/?q=ibm+&image_type=&cat=&min_width=&min_height=

INGHJUVANÌ I CÈDDULI : DA QUÌ À POCU UNA MIDICINA !

Artìculu Facebook di u 02/04/17

Da ramintassi… In u 2013, u circadori australianu David Sinclair è a so squatra ani riisciutu à fà inghjuvanì i mùscula di tupìchjula par vìa d’una mulècula prudutta naturalamenti da l’urganìsimu : a NAD (nicutinamida adinina dinucliòtidu).

A NAD si piatta in i mitucundrìi, ‘ssi urganita chì sèrvini à pruducia inirgìa. Or hè statu custatatu chì incù l’anni, a prisenza di NAD diminusci, ciò chì cunduci à una calata di a pruduzzioni d’inirgìa chì edda favurisci a invichjera. Ma l’affari hà pussutu essa cambiatu : cù a riintruduzzioni di NAD i scambia trà i mitucundrìi è i nacioli di i cèdduli sò stati stabiliti è i tissuta di i mùscula di i tupìchjula sò stati inghjuvaniti, ritruvendu i so facultà di prima.

Dipoi, a squatra di Sinclair hà dinò prugrissatu, sopra à tuttu in a capiscitura di u micanìsimu missu in baddu par ghjunghja à ‘ssi risultata. Si sà chì tutti i cèdduli ani à a nàscita a capacità d’accuncià di disguasta di l’ADN (mulècula chì cunteni a infurmazioni ginètica) accaduti quandu i cèdduli si scumpàrtini o quandu ci hè influenza d’agenta sterni com’è u soli. In ‘ssa riparazioni intarveni un cumpunenti chjamatu PARP-1 chì eddu riesci à fà u so travaddu quand’edda hè alta a prisenza di a famosa NAD è viciversa, s’edda cala a prisenza di NAD, PARP-1 hè menu pirfurmanti è si vasta l’ADN…

Or a squatra di Sinclair hà fattu sapè pocu fà, ch’edda t’avìa riisciutu à metta à u puntu una midicina chì cunteni u pricursori di a NAD. Pruvatu ind’è i tupìchjula a riparazioni di l’ADN hè stata custatata è sò stati ancu invirsati i finòmini.

Si parla oramai di metta à u puntu una midicina par l‘èssaru umanu. Sarìa in capacità d’arristà u prucidimentu d’invivhjera, d’ammiddurà a riparazion di l’ADN è pudarìa ancu aiutà l’astrunàuti à rèndasi à nantu à Marzu parchì prutetti da u raghjunamentu còsmicu (à nantu à ‘ssu puntu, a squatra di Sinclair travadda in cullaburazioni cù i sciintìfichi di a NASA).

« I cèdduli di i tupìchjula vechji ùn pudìani più essa diffarinziati da quiddi di i tupìchjula ghjòvani, dopu à una sittimana di trattamentu »

… cussì dicìa u Prufissori David Sinclair.

#RajeunirCellules #RejuvenateCells

Da quì à 6 mesa sarani rializati i prima provi à nantu à l’Omu…

Da leghja : http://trustmyscience.com/les-scientifiques-peuvent-a-present-inverser-le-vieillissement-adn-chez-les-souris/

Ritrattu : https://pixabay.com/en/photos/?q=souris+laboratoire&image_type=&cat=&min_width=&min_height=

UN LÌQUIDU PAR RITENA L’INIRGÌA DI U SOLI !

Artìculu Facebook di u 31/03/17

Sò stati fabricati da un laburatoriu in Sueda, mulèculi sintètichi chì riagìscini à u soli : cù u lumu ch’eddi ricèvini càmbiani di cunfigurazioni è sò capaci di ritena l’inirgìa di u soli drentu à i so ghjunturi chìmichi. Poni stà cù a ‘ssu novu aspettu parechji mesa o ancu annati. Dopu in prisenza d’un catalizatori ani da ritruvà a so cunfigurazioni di nanzi è tandu libarèghjani calori.

L’idea ùn hè micca nova : 50 anni fà si ni parlaia dighjà è dipoi 10 anni ci si travaddu da veru à nantu. 4 anni fà si riiscìa à cunverta 0,01 % di l’inirgìa di u soli. Oramai u rindimentu hè di 1,1 %.

Or accuppiendu ‘ssu prucidimentu à i panedda sulari abituali si pò cunverta 80 % di u lumu di u soli.

D’altrondi, a mulècula artificiali criata par rializà ‘ssa prudezza pò accittà 140 cìcula di trasfurmazioni.

Nanzi di passà à una pruduzzioni industriali ci hè sempri bisognu d’ammiddurà i risultata ma l’avvena pari prumittanti.

#LiquideEnergieSoleil #LiquidSolarEnergy

Da leghja : https://www.sciencesetavenir.fr/high-tech/stockage-liquide-pour-le-solaire_111667

Ritrattu : https://pixabay.com/en/photos/?image_type=&cat=&min_width=&min_height=&q=soleil&order=popular

U VULCANU L’ETNA ENTRI IN IRUZZIONI UNA VOLTA DI PIÙ È FACI 10 FERTI !

Artìculu Facebook di u 17/03/17

In Cicilia, l’Etna, u vulcanu u più attivu d’Auropa, ùn pianta di schiattà dipoi a fin’ di frivaghju.

Pocu fà, u 15 di marzu ci hè stata una splusioni à 3200 m d’altitùdina è u 16 una antra à 2700 m. Ghjè tandu chì turisti, ghjurnalisti è sciintìfichi sò stati ferti ricivèndusi in capu petri caldi.

Hè una zona ditta « ciadda » veni à dì una zona indu’ i parsoni sò auturizati à cuddà, à cundizioni d’essa accumpagnati d’un vidaghjolu. À nantu à i 35 parsoni prisenti à u mumentu di a splusioni, 10 sò stati tocchi è ancu assà ùn era tantu gravu…

A lava in fusioni hè intruta in cuntattu cù a nevi ghjilata, ciò chì hà datu a nàscita a una quantità impurtanti di vapori. Or quandu tuttu ‘ssu vapori s’hè libaratu da a lava chì u imprighjunaia a riazzioni hè stata splusiva.

#EtnaDixBlessés #EtnaTenInjured

Da leghja: https://www.google.fr/amp/m.leparisien.fr/amp/environnement/nature/video-italie-une-equipe-de-la-bbc-blessee-pendant-l-eruption-de-l-etna-17-03-2017-6770226.php

Ritrattu: https://pixabay.com/fr/%C3%A9ruption-etna-explosion-volcan-1838809/

I CÈDDULI ARTIFICIALI ÒFFRINI PARECHJI PUSSIBILITÀ

Artìculu Facebook di u 16/03/17

A squatra di u biuticnulugistu amiricanu John Craig Venter, hà criatu di modu artificiali una battirìa cù solu i 473 gena nicissarii à a vita (in paragonu, u ginomu di l’omu cunteni à pocu pressu 30 000 gena). Or ‘ssu tippu di micruurganìsimi rializatu in laburatoriu pudarìa intaragì cù u sistema imunitariu umanu o ancu attaccà i cèdduli chì dani u càncaru.

‘Ssa biulugìa di sìntasi pò iffittivamenti circà di rializà midicini sopra misura, adattati à u ginomu è à u micrubiomu di inghjunu. Si pò circà dinò di crià battirìi chì eddi ani da luttà contru à i battirìi chì si musciàiani in capacità di risista à l’antibiòtichi. Un micruurganìsimu artificiali pò ancu serva à a ditizzioni di malatìi rinviendu un signali spicìficu una volta intrudutu in l’urganìsimu. Certi battirìi pudarìani essa criati par intrudùciasi drentu à i tumori par pudè distrùghjali. In fini, di sicuru, i cèdduli artificiali òffrini a pussibilità di crià òrgani sigondu i dumandi pà i transplantazioni…

#CellulesArtificielles #ArtificialCell

Da leghja : https://www.sciencesetavenir.fr/sante/cellules-artificielles-4-applications-medicales-innovantes_111182

Ritrattu : https://pixabay.com/en/photos/?image_type=&cat=&min_width=&min_height=&q=cellule+artificielle&order=popular

I MAMMUTTA LANOSI ANI DA ESSA RINVIVITI !

Artìculu Facebook di u 05/03/17

Un gruppu di circadori di l’Univarsità amiricana d’Harvard hà annunciatu ch’eddu era à nantu à u puntu di fà rinascia un mammuttu lanosu. Si sèrvini di i infurmazioni ginètichi ritrovi drentu à animali cunghjilati è bè cunsirvati in a tundra di Russìa. Ni vòlini tandu prufittà par ficundà cù ‘ssu ADN di mammuttu, una alifanti chì dopu darà a nàscita à un alifantimammuttu…

#MammouthRéssuscité #MammothRessurrected

Da leghja : http://www.laterredufutur.com/accueil/dici-2-ans-un-mammouth-laineux-reviendra-a-la-vie/

Ritrattu : https://pixabay.com/en/sculpture-animal-sculpture-1679722/

L’OCHJA CRISCIUTI : À CHÌ NI SEMU ?

Artìculu Facebook di u 28/02/17

Ci sò prugetta nati in u 2015 o in u 1016. Si n’aspetta nutizii freschi, intantu ramintemu qualessi èrani :

1. Ci hè u prugettu di a sucità MHOX. I so cuncipitori ani imaginatu un globu uculariu chì pirmittarìa di fà crescia a visioni passendu à 15/10. Si pudarìa dicida di veda in culori, in neru è biancu o di pruvà parechji altri spettra culuriti. Si pudarà fà un zoom, veda di notti o imbrancassi cù internet (par vìa d’una pulgia wifi stallata à nantu à u narbu òtticu).

Da leghja : https://iatranshumanisme.com/2015/04/25/un-projet-doeil-bionique-qui-pourrait-faire-basculer-lhumanite-dans-le-transhumanisme/

2. Google hà rimissu un brivettu di una vitricedda pà a vista (lintichja di cuntattu) particulari, cù cumpunenti varii : cattadori di battarìa, di radiò, di accatamalzera… Hè sottu à a forma d’un lìquidu chì si metti in l’ochji è chì ni pidda a forma dopu, sicchendu. Pirmittarà d’ammiddurà a vista è ancu di mèttasi in cunnizzioni cù apparechja par dispona d’infurmazioni in u so campu di visioni (infurmazioni GPS, piddà ritratta, veda a notti…).

Da leghja : http://www.europe1.fr/emissions/innovation/la-lentille-connectee-a-injecter-dans-loeil-2735281

3. Ci hè a lintichja Ocumetics Bionic Lens di una sucità canadiana. Hè l’òpara di Dareth Webb un uttumitristu di a pruvincia di Culumbìa Brittànica. Dici chì ni sarà finita di i spichjetti è di i lintichji usuali. ‘Ssa vitricedda duvarìa pirmetta di curreghja tutti i prublema di vista è di crescia i capacità visuali. Par mèttala bàstani 8 minuti è si faci senza anistisìa.

#OeilAugmenté #IncreasedEye

Da leghja : http://www.maxisciences.com/lentille-de-contact/bientot-des-lentilles-de-contact-bioniques-pour-u

Ritrattu : https://pixabay.com/en/eye-pupil-iris-see-eyelashes-lens-597560/