UGITTIVU « ZERU ACCIDENTI », ANCU NANZI À I VITTURI AUTÒNUMI

– usciintificuchju.com – Dumènica u 12 d’aostu 2018

Da quì à calchì tempu, u viìculu autònumu ci pirmittarà di francàssila da a maiò parti di l’accidenti sapendu chì 90% sò u risultatu di l’òmini. Intantu, ancu senza aspittà l’autunumìa tutali di i vitturi, a tinnulugìa duvarìa ammiddurà a sicurità stradali di modu significativu.

In principiu d’istati, u fabbricanti di matiriali alimanu ZF (unu di i più maiori di u mondu), hà prisintatu un prututippu di vittura arnisatu di u matiriali nicissariu par privena di u prìculu è ività u più pussìbuli d’accidenti. Sò numarosi i cumpunenti chì vani da a dirizzioni littrònica à a suspinsioni attiva, passendu pà a camerà à tripia òttica.

L’ugittivu di ‘ssu dimustradori hè di purtà risposti contru à u divirtimentu à u chjerchju. Cù una camerà à u laseru, posta drentu, a vittura hè in capacità di veda sì u cunduttori hè cuncintratu o micca à nantu à a strada. U so prufilu hè matirializatu in 3D. S’eddu volta u capu inveci ch’eddu si prisenta un prìculu, una alarma si faci senta in l’abitàculu è implusioni sarani dati à nantu à a vida. Casu mai, s’eddu ùn hà riagitu u cunduttori, a littrònica pidda i cumandi par impidì l’accidenti. A vittura hè duvintata autònuma un cortu mumentu.

Un altru casu, cuncerna u contrasensu. Cù a camerà chì ricunnosci i scrittoghja, a vittura pò sapè sì u cunduttori pidda a bona strada o micca. S’eddu pidda un sensu intardittu una alarma visuali affacca à nantu à u u tavuleddu di bordu cù in più, impulsioni à nantu à u chjerchju par falli capì chì li tocca à cambià di strada. A vittura pò ancu frinà di modu autumàticu.

Par avali hè solu un dimustradori chì di règula si vidarà pà u salonu di Francfort. Intantu a tinnulugìa asisti è basta pocu par giniralizalla. Cù tutti ‘ssi tinnulugìi di sicurità attiva (radara, camerà, lidara) è di sicurità passiva (ariabaga, cinti intilligenti), chì tutti sò di più in più in leia, ZF affirma chì u nùmaru di i morti à nantu à i stradi pudarìa calà di 30%.

Da leghja :http://www.observatoire-vehicule-entreprise.info/content/le-z%C3%A9ro-accident-est-il-possible

Ritrattu : https://pixabay.com/fr/accident-voiture-collision-crash-151668/

UN BULIGHJUMU SÒLIDU QUANT’È U SCUDU DI “CAPTAIN AMERICA”

– usciintificuchju.com – Sàpatu u 21 di luddu 2018

Circadori amiricani ani annunciatu ch’eddi t’ani cuncipitu un mischiu duru quant’è u scudu di u famosu parsonaghju di figuretti di scienzi finzioni, Captain America…

Si tratta di circadori di l’univarsità di u Texas Supranu. U mischiu missu à u puntu hè da veru risistenti. Pò essa micca com’è quiddu di u scudu di l’aroiu di figuretti amiricanu ma a so durezza pari quantunqua d’un altu niveddu.

A fòrmula par ghjunghja à un matiriali cussì duru hè u risultatu d’un buleghju di parechji ilimenta tutti sdrutti à u listessu tempu : u cromu, u cubaltu, u farru, u manganesu è u siliciu. Par riescia ‘ssu bulighjumu ci hè bisognu di rializà una strufinera intensa po d’impastà. Hè un mètudu chì cunduci à a rializazioni d’un mischiu d’alta antrupìa (funzioni chì carattirizeghja a crèscita di un disòrdini in un sistema è a digradazioni di l’inirgìa).

Dopu à ‘ssa scuparta i circadori riflèttini à comu dà un usu cumirciali à ‘ssu matiriali… vistu chì par avà, ‘ssu mischiu costa beddu troppu caru… Hè vera chì una tonna di farru costa menu di 60€, inveci ch’una tonna di cubaltu (unu di i ingridienti di u mischiu) costa à pocu pressu 70 000€ !…

Da leghja : https://www.futura-sciences.com/sciences/actualites/physique-alliage-presque-aussi-resistant-bouclier-captain-america-72065/

Ritrattu : https://pixabay.com/fr/captain-america-bande-dessin%C3%A9e-1293949/

I SULUZIONI DI A NASA CONTRU À L’AFFACCCATA D’UNA MITIURITA

– usciintificuchju.com – Dumènica l’8 di luddu 2018

Parechji rivisti ùn ani isitatu à parlà di suluzioni à « l’Armageddon » com’è in u filmu amiricanu di 1998, indu’ sò inviati astrunàuti à nantu à una mitiurita par falla schiattà nanzi ch’edda si sfragichessi à nantu à a tarra… Filmu chì tiraia u so nomu da a parola riligiosa ricacciata da u ghjudicamenti ùltimu in a bìbbula chì tratta di u cumbattu finali chì uppuni i forzi di u bè à quiddi di u mali.

Hè vera chì una cullizioni cù una mitiurita pudarìa essa fatali pà a vita à nantu à a Tarra. L’accidenti di u 15 di frivaghju 2013 hà ramintatu à tutti chì l’affari ci pudìa accada. Quiddu ghjornu una mitiurita di 15 metra di diàmitru hà schiattatu in pezza da sopra à a villa russia di Ciliabinsca. A scena era stata filmata è più di middi parsoni èrani stati ferti da i vetra chì si sò rotti.

I mitiuriti i più maiori, d’omancu un chilòmitru, sò dighjà stati idintificati è i diffarenti studia annònciani chì pà i sècula chì vènini ùn duvarìani micca scuntrà a Tarra. Ma i mitiuriti, più minori è quantunqua di parechji cintinai di metra, ùn sò ancu stati studiati. Or a pussibilità ch’eddi si sfragichèssini à nantu à a tarra asisti da veru è i disguasta sarìani tarrìbuli : un paesu sanu sarìa toccu.

Parechji pussibulità asìstini tandu :

Com’è in u filmu si pudarìa fà saltà una bomba nucliaria. Ùn hè micca pò essa una ubligazioni di falla schiattà à nantu à a mitiurita è ancu à cantu bastarìa. Intantu, tutti i pezza sciuti da a so distruzzioni pudarìa riprisintà parechji minacci pà a Tarra.

Una antra pussìbilità pò essa d’invìà satèlliti intornu à a mitiurita par rializà à nantu ad edda una forza di gravitazioni chì pianu pianu l’ani da fà cambià di strada. U prublema hè chì l’affari pò piddà troppu tempu à pettu à l’urgenza di a stuazioni.

A missioni DART (Double Asteroid Redirection Test) di a NASA : hè privista pà u 2020. Sarà tandu lanciatu un satèllitu in dirizzioni d’un coppiu d’astiròidi : Didymos A, di 800 metra di diàmitru, è a so luna, Didymoon, di 170 metra di diàmitru. Cù una vitezza di 6 chilòmitri par siconda, DART hà da pichjà Didymoon par falli cambià a so òrbita iniziali mudifichendu a so vitezza.

U prugettu HAMMER (Hypervelocity Asteroid Mitigation Mission for Emergency Response) di a NASA. Un astiròidu chjamatu Bennu pudarìa tuccà a Tarra in u 2135. Faci 500 metra di diàmitru è sarìa un veru scempiu s’eddu ci casca à dossu : intrendu in l’atimòsfara cacciarìa una inirgìa listessu à 80 000 bombi d’Hiroshima. A NASA hà pensu allora à còpralu di pintura ! Cambiendu di culori sarìa spostu di modu diffarenti à i spiriona di u soli. Si riscaldarìa è a so dirizzioni ni sarìa mudificata. Intantu, nanzi di sapè da veru chì fà, a NASA conta d’’uttena infurmazioni à nantu à Bennu. Quissa hè a missioni d’un antru satèllitu dighjà inviatu in u spaziu dipoi 2016, OSIRIS-REX è chì ci purtarà prilivamenta in u 2023.

À U Sciintificuchju, com’è sicuramenti a cumunità sciintìfica intirnaziunali, semu impacenti di cunnoscia risultata cuncreti da tutti ‘ssi spirienzi in privisioni. Ancu s’eddu ùn ci voli à dramatizà, una minaccia hè riali è ci tocca à tena à menti chì quantunqua si tratta di… l’avvena di l’umanità sana sana !

Da leghja : http://www.leparisien.fr/sciences/la-nasa-envisage-de-peindre-un-asteroide-geant-pour-eviter-son-impact-avec-la-terre-22-03-2018-7623861.php

http://www.leparisien.fr/sciences/video-la-nasa-va-tenter-de-devier-un-asteroide-potentiellement-dangereux-03-07-2017-7107018.php

Ritrattu : https://pixabay.com/en/asteroid-rock-astronomy-space-3113282/

CERTI ANIMALI IMPÀRANI À CAMPÀ A NOTTI PAR ÙN ISCUNTRÀ… L’OMU !

– usciintificuchju.com –  Marti u 26 di ghjunghju 2018

Di règula, par pruttèghjasi, l’animali pùgnani dighjà d’ùn iscuntrà l’òmini. Or certi vani ancu più luntanu, ublighèndusi à campà a notti. Hè u risultatu d’unu studiu rializatu da circadori amiricani è publicatu pocu fà (u 15 di ghjunghju) in a rivista Science.

U studiu pidda appoghju à nantu à 76 altri studia fatti nanzi. Cuncèrnani 62 spezii diffarenti è situati à nantu à i 6 cuntinenti è ùn ci pò essa dùpitu à nantu à i risultata. Sò stati paragunati i cumpurtamenta di l’animali sigondu a prisenza o micca di l’omu. Quandu u scontru di ghjornu hè sicuru, l’animali scèddini di sorta di notti.

Di sicuru, ‘ssu cambiamentu di cumpurtamentu ùn hè senza cunsiquenzi. Certi animali ani a capacità d’adattassi inveci chì d’altri si ritròvani sposti à pridaghji novi o tròvani da manghjà cù dificultà ghjustu parchì ùn ci vèdini tantu. Par parechji a so ripruduzzioni duventa più cumplicata è a so durata di vita diminuisci.

Intantu, ci voli à veda chì à l’èpica di i dinusàuri hè cussì ch’eddi campàiani l’animali i più chjuchi. Dopu ghjustu à puntu, cù u sterminu di i dinusàuri i mammìfari ani sappiutu prufittà di una nichja iculògica nova : u ghjornu. Ni prufìttani d’altrondi, dipoi 65 milliona d’anni. Tamantu ritornu in daretu dunqua chè di vultà à una attività di notti.

Una attitùdina nova chì risica d’essa cunfurtata da a pulluzioni luminosa di i cità, aiutendu certi animali à veda. Cità indu’ u muddizzu pruduttu da l’òmini pò offra dinò una nutritura senza à avè bisognu di caccighjalla. U riscaldamentu climàticu pò cuntribuì ancu eddu à accilarà ‘ssu cambiamentu di cumpurtamentu animali. S’eddu faci troppu caldu, di ghjornu hè meddu à dorma è di notti sarà l’uccasioni di truvà un pocu di friscura.

Chì ni sarà à longu andà di a biudivarsità ? Chì animali sarà da veru in capacità di suppurtà tutti ‘ssi cambiamenta ? Senza cuntà chì a cuabitazioni cù l’omu hè diffìciuli avà ch’è no semu 7 miliarda è mezu… chì ni sarà in l’avvena, vistu chì a pupulazioni umana, edda ùn pianta mai di crescia !…

Da leghja : https://dailygeekshow.com/animaux-vivre-nuit/

http://www.lefigaro.fr/sciences/2018/06/14/01008-20180614ARTFIG00396-les-mammiferes-se-remettent-a-vivre-la-nuit-pour-echapper-a-l-homme.php

Ritrattu : https://pixabay.com/fr/fox-le-renard-roux-nuit-la-faune-579202/

RIMARCATI SEMU DA UN ANTRU SITU WEB

– usciintificuchju.com – Vènnari u 22 di ghjunghju 2018

Viaghjendu à nantu à u net, semu cascati à nantu à un situ web, « Lingua Corsa Billezza Viva », cunsacratu à a lingua corsa. Ci truvareti pruverbia, tavuledda di cungicazioni, listi di dizziunaria o di lipra par imparà u corsu… è ancu una lista di sita web didicati à a lingua corsa … or ghjè quì ch’è no semu mintuvati cù u suparlativu… « excellent !». Ringraziemu di sicuru i so autori è li dimu chì ‘ssa parola hè una mutivazioni par cuntinuà u nosciu travaddu.

D’altrondi vi pudemu annuncià u pròssimu artìculu di U Sciintificuchju : « CERTI ANIMALI IMPÀRANI À CAMPÀ A NOTTI PAR… ÙN ISCUNTRÀ L’OMU ! »

Intantu, bona furtuna à « Lingua Corsa Billezza Viva »…

Da leghja : http://e.garidacci.pagesperso-orange.fr/liens/sites-corses-1.htm

FÀ RINASCIA U SMALTU DI I DENTI PARI PUSSÌBULI

– usciintificuchju.com – Màrcuri u 13 di ghjunghju 2018

U smaltu chì copri i nosci denti hè un matiriali duru, capaci di risista à i numarosi agrissioni ch’eddu pò subì di modu cutidianu (attacca acidi o svariatezzi maiori di timpiraturi). Ma à forza d’essa maltrattatu finisci par essa arruvinatu è par disgrazia, ‘ssu matiriali hè incapaci di ricustituìsciasi da par eddu. Cussì affàccani i denti macagnati chì poni essa particularamenti dulurosi.

Intantu, circadori amiricani ani pò essa trovu una suluzioni à ‘ssu prublema, vistu ch’eddi t’ani riisciutu à ilaburà un matiriali assistatu di a listessa manera chè u smaltu di i nosci denti. Si tratta d’un matiriali prutèicu chì pò fà principià è avvià a crèscita di nanucristalla d’apatita, i listessi chì accumpàgnani u sviluppu di u smaltu indrentu à a noscia bocca.

Tandu, appiighendu ‘ssu pruduttu à nantu à prublema di denti criati di modu artificiali, i circadori ani pussutu custattà chì u smaltu riiscìa à rifassi.

‘Ssu trattamentu ùn pudarà essa ifficaci contru à i denti macagnati troppi prufondi parchì tòccani ancu l’ivoriu, sottu à u smaltu. Ma hè quantunqua una avanzata maiori. I prima provi in laburatoriu sò stati fatti cù successu. Ferma avà à falli cù pazienti riali.

L’ugittivu hè di ghjunghja à una sustenza da appiigà in privinzioni di i denti macagnati. ‘Ssa sustenza pudarà essa amministrata di modu cutidianu à mezu à un pruduttu com’è u dintifriziu par asempiu.

Tandu, calchissìa cù una bona igiena di a bocca, n’avarà finitu cù i denti macagnati chì mai sarani in pussibilità di custituìsciasi.

Da leghja : https://www.ouest-france.fr/sante/sante-faire-repousser-l-email-des-dents-une-piste-contre-les-caries-5702508

https://www.consoglobe.com/faire-repousser-email-dentaire-soigner-caries-cg

https://www.futura-sciences.com/sante/actualites/medecine-caries-nouvelle-technique-faire-repousser-email-dents-70939/

Ritrattu : https://pixabay.com/en/teeth-dentist-dental-mouth-white-1652937/

SUCCESSU PÀ U FORU DI I MATIMÀTICHI IN PORTIVECHJU

– usciintificuchju.com – Luni u 28 di maghju 2018

‘Ssu vènnari u 25 di maghju hè statu rializatu à u centru culturali di Portivechju un Foru di i Matimàtichi. Fusti un veru successu. U Sciintificuchju era prisenti.

Tuttu hà cumenciu 8 anni fà, in u 2010 in Biguglia cù u prima foru di i matimàtichi. L’iniziativa era purtata da l’associu « Maths pour tous » è da unu di i so membra fundatori, u prufissori Dumènicu Barbolosi. Si tratta d’un circadori ‘n i matimàtichi appiigati à a midicina chì insegna à l’Univarsità d’Ècchisi è Marseglia. Uriginariu di Còrsica hà tinutu à rializà cù u so associu, una prima manifistazioni impurtanti in Còrsica. Sùpitu hè stata un successu. L’annu dopu Dominique Barbolosi è i membra di « Maths pour tous » ricumènciani in Aiacciu è dipoi tutti l’anni u cuncettu hè ripruduttu in Còrsica (Corti, Bastìa, Pitretu è Bicchisgià… Portivechju) è ancu in Francia (Ècchisi è Marseglia). Da nutà dinò chì Barbolosi è i so amichi sò à l’iniziativi di i ghjurnati di a scienza in Ucciani.

CHI HÈ L’ASSOCIU « MATHS POUR TOUS » ?
Oramai sicundata in Còrsica da a struttura « I matimàtichi par tutti », cù Pascale Brescaglia à a so testa, l’associu « Maths pour tous » hà par ugittiva di prisintà i matimàtichi com’è una disciplina aparta à nantu à u mondu è l’altri scienzi (a midicina, a biulugìa, i fìsichi, a natura, l’architittura, a tinnulugìa…). Cussì hè scrittu à nantu à u so situ internet chì priciseghja ch’eddu hè un associu transginiraziunali, chì adunisci prufissori, studianti è altri sculari, tutti passiunati da i matimàtichi è cù a vodda di sparta l’amori di a so disciplina cù u più pussìbuli d’aienti. Di sicuru, frà altru, hè à traversu un foru, ch’eddi cuncritizèghjani a so brama.

IN CHÌ CUNSISTI UN FORU DI I MATIMÀTICHI ?
Si tratta di muscià, sopra à tuttu à i ghjòvani, mubilizendu i sculari, chì i matimàtichi si ritròvani ‘n a vita di tutti i ghjorna è ch’eddi sò indispinsèvuli à mori disciplini sopra à tuttu sciintìfichi. Tandu sò rializati mori attella interattivi, ghjoca, animazioni è cunfarenzi… cù a participazioni di studianti, prufissori è circadori ancu famosi. I ziteddi pà u più custituìscini u pùblicu ma parechji dinò sò animatori… Asarciziu più ch’intarissanti chì l’impara à sprìmasi davanti à mori parsoni. Po ùn ci hè nudda di meddu par cunvincia altri ziteddi chì in fin’ di contu i matimàtichi poni essa piacèvuli, chè di falli spiigà da i ziteddi stessi…

QUISTU ANNU IN PORTIVECHJU
In a Cità di u Sali sò stati aduniti pà un prima foru di i matimàtichi, guasgi 700 sculari, da u CM1 à a tarminali. I ziteddi sò ghjunti da i scoli Purtivichjacci è da Zonza, ma certi dinò sò falati da u Fiumorbu, da a a Casinca, da Bastia o da Sartè. Èrani pruposti 23 standa, par certi animati da liciani o studianti vinuti da Marseglia è par d’altri da liciani Purtivichjacci o culligianti Bastiacci… Pà ‘ssa ghjurnata sò stati allora assuciati i matimàtichi à u ghjocu Rubik’s cube, à a rubòtica, à l’illusioni auditivi, à l’arti di a carta piigata, à u Slime (‘ssa pasta piccisosa à a moda in ‘ssu mumentu)… Dinò sò stati prisintati filmetta di prublema matimàtichi, fatti in lingua corsa da ziteddi. Po ci sò stati 6 cunfarenzi prugrammati da a mani à a sera par parlà di i « nùmari prima » di a « quattrèsima diminsioni » o di l’aiutu di i matimàtichi à fà « diagnòstichi midicali »… À setti ori è mezu di sera, sò intarvinuti Dominique Barbolosi è Xavier Muracciole par muscià chì i matimàtichi pudìani aiutà i duttori à sapè comu accuppià i so diffarenti tirapìi contru à u càncaru (radiutirapìa è immunutirapìa) par essa u più ifficaci pussìbuli…

Bedda ghjurnata dunqua, cù mori cunniscenzi spartuti è chì pò essa avarà cuntribuitu à mutivà unipochi di ghjòvani à aduprà i matimàtichi, com’eddu l’hà ditta Barbolosi « micca solu par vincia solda sendu unu spertu di a finanza ma piuttostu par cuntribuì à u bè di tutti, luttendu contru a pulluzioni o i malatìi… ».

Da leghja : http://www.matheopolis.fr/MPT/index.html

Ritrattu : U Sciintificuchju