L’ANDUMITRIOSA : MALATÌA POCA CUNNISCIUTA È DIAGNUSTICATA SUVENTI TROPPU TARDI.

Artìculu Facebook di u 05/02/17

Hè una malatìa crònica, chì ancu midicata pò vultà è chì cuncerna i donni in anni di fà i fiddoli. Hè à bastanza fraquenti (tocca una donna à nantu à deci).

L’andumetru hè u tissutu chì copri l’uteru. In u cìculu nurmali di a donna l’andumetru cresci par essa prontu in casu di grussezza. Sì ficundazioni ùn ci n’hè, si sdrughji è pruduci u sangui di i fèmini. Hè a norma. Or ind’è i donni tocchi da l’andumitriosa, cèdduli di l’andumetru ani da ricuddà par vìa di i trombi è sviluppassi dopu for’ di l’uteru, culunizendu altri òrgani. Di règula sò tocchi l’òrgani ginitali è l’òrgani di u saccu adduminali ma dinò si pò sparghja à l’apparechja urinariu, digistivu o ancu pulmunariu.

Comu si manifisteghja ?

A maiò parti di u tempu sò dulora forti è pò ancu cunducia à a infirtilità.

I dulora affàccani più particularamenti quand’eddi t’ani i so sangui i fèmini (suventi si dici ch’eddu hè nurmali è ùn si pensa à ‘ssa malatìa). Certi volti hè à l’uccasioni di i rapporta sissuali o quand’eddu si và in cabinettu…

Da nutà chì in certi casi ùn si manifisteghja micca è si scopri par azardu quandu si ricerca una raghjoni à una dificultà à uttena un ziteddu.

Ancu assà, tutti ‘ssi lisioni di l’andumetru è i culunizazioni d’òrgani ùn sò murtali. Hè raru ch’eddi impighjurìschini da duvintà gattivi gattivi sopra à tuttu s’eddi sò trattati.

Comu si midicheghja ?

Pà riducia i dulora si pò fà un trattamentu urmunali ma a chirugìa hè u trattamentu di rifarenza. Par disgrazia certi volti, si càcciani i dulora ma nasci un antru prublema : a incuntinenza.

Una malatìa ch’ùn hè ancu capita bè.

I miccanìsimi stessi di a so ghjunta ùn sò cunnisciuti bè. Di prima abordu, hè una ricuddata di sangui chì cunduci in i trombi pezza d’andumetru in capacità di sviluppassi dopu in corpu. ‘Ssu sviluppu pari dipenda dopu di caràttari pròprii à a parsona tocca. I circadori pùgnani d’indintificà i gena chì poni essa rispunsèvuli di l’attivazioni di ‘ssa malatìa.

#Andométriose #Endometriosis

Da leghja: http://www.inserm.fr/dossiers-d-information/endometriose

Da fighjulà : (Europe1) https://www.youtube.com/watch?v=lEk9Bb4c5GI

Ritrattu : https://stock.adobe.com

ZITEDDU À TRÈ PARENTI BIULÒGICHI !

Artìculu Facebbok di u 02/02/17

In u 2015 u Riamu Unitu daghjìa l’auturizazioni par falla. In u 2016 u Mèssicu a facìa pà a prima volta. Avà hè in Uccrena (era u 5 di ghjinnaghju 2017) ch’eddu hè natu un ziteddu cuncipitu cù u matiriali ginèticu di trè parenti. Infurmazioni di primura chì di sicuru chjàmani à una riflissioni à u niveddu èticu… Ci vultaremu.

#TroisParents #ThreeParents

Ritrattu : https://pixabay.com

I VITTURI BULANTI : CI SEMU GUASGI !

Artìculu Facebook di u 01/02/17

Eccu, unipochi d’infurmazioni à l’accortu :

Ùn màncani i prugetta sedii, chì si duvarìani cuncritizà in un avvena vicinu… Xplorair, u dronu d’Ehang, u dronu d’Airbus, u dronu d’Uber, a Terrafugia TF-X, u prugettu di « piattinu bulanti » di Zapata Racing (cuncipitori di u Flyboard Air, chì pirmetti dighjà à un omu « spurtivu » di bulà!).

Di sicuru, vultaremu à nantu à tutti ‘ssi prugetta, sviluppendu i infurmazioni à nantu. À prestu !

# Voiture Volante #FlyingCar

Ritrattu : http://www.laterredufutur.com

I VIRUS CUMINICHÈGHJANI !

Artìculu Facebook di u 29/01/17

Circadori israiliani ani missu in ividenza un veru sistema di cuminicazioni trà virus. A scuparta s’hè fatta di manera indiretta, un pocu par azardu… I circadori studiàiani ghjustu à puntu a cuminicazioni di i battirìi è vulìani veda s’eddi èrani in capacità di privènasi d’un attaccu di virus. Or, in fin’ di contu, quiddi chì cuminicàiani, èrani i virus.

Comu si passa l’affari ?

Quand’eddi attàccani i virus, li tocca à firmà beddi attivi : ùn hè ora d’addurmintassi ! Par quissa ani un genu chì li cumanda d’ùn entra in una fasa « durmanti ». Or, à tempu ch’eddi si fìccani in una battitìa, par nutrìsciasi è riprudùciasi, làmpani una mulècula (chjamata « abritrium ») chì parti è s’infrugna in una antra battirìa ancu attaccata. Tandu, l’altri virus ani da pudè scedda : o multiplicassi o addurmintassi.

Chì hè a lògica ?

Si tratta pà u virus d’ùn tumbà tutti i battirìi d’un colpu chì o sinnò ùn avarìa più à bastanza matiriali par riprudùciasi è finisciarìa par sparì. Laca allora unipochi di battirìi vivi, i laca sviluppassi è quandu eddu ci n’hè dinò à bastanza si lampa in una antra fasa d’attaccu è cuntinueghja à multiplicassi.

Eccu una stratigìa bedda cumplessa in manu à un affaruchju beddu sèmpliciu… Si tratta d’una strattigìa par gistì à u meddu i risorsi, un pocu com’eddu a faci l’Omu quand’eddu cerca à rigulamintà a pesca o a caccia…

Di sicuru hè una scuparta di primura chì ni chjama d’altri…

#CommunicationVirus

Da leghja : http://sante.lefigaro.fr/article/les-virus-se-parlent-avant-d-attaquer

Ritrattu : https://pixabay.com

U PRIMA BATTEDDU À IDRUGENU HÈ NATU ! SI CHJAMA ENERGY OBSERVER !

Artìculu Facebook di u 25/01/17

Eccu una prima nutizia pà u Fugliettu « U Sciintificuchju ». Ci ni sarìa tanti à metta ma ci voli à fà una scelta è par cumincià ci parìa impurtanti di muscià chì l’Omu pò tirà prufittu di a Natura senza distrùghjala, è al di là annuncià una vera rivuluzioni in u duminiu di l’inirgìi : un « mondu pulitu » hè pussìbuli !

Solar Impulse hà fattu u tornu d’u mondu in l’aria par vìa di u soli. Energy Observer farà ancu eddu u tornu di u mondu ma à nantu à l’acqua. Ghjè una pirfurmenza umana è ticnulògica. Funziunarà cù un buleghju d’inirgìi pà u sempri : u ventu, u soli è l’idrugenu di l’acqua.

‘Ssu batteddu pussedi un ponti cupartu di panedda futtuvultàichi, daretu ci sò dui iulianni è à a piazza di i maghja, solu una vela intilligenti piluttata par infurmàtica. A so uriginalità teni in una unità d’idrulisa di l’acqua chì pruduci l’idrugenu.

U batteddu partarà di branu, da a Brittagna (in Saint-Malo). Farà u tornu di u mondu visitendu più di 50 paesa è fendu più di 100 arresta. L’uggittivu hè di pruvà i novi ticnulugìi in cundizioni riali è dinò di scuntrà aienti chì poni avè idei è suluzioni uriginali pà u bè di a Natura.

Una avintura privista di durà 6 anni par fidirà tutta una cumunità, à u niveddu intirnaziunali, pronta à rilivà a sfida di fà un mondu novu par dumani.

« U futuru cumencia avà, tocca à no à dalli a bona dirizzioni »

A ci dìcini Victorien Erussard (capitanu  di Energy Observer) è Jérôme Delafosse (capu di spidizioni di Energy Observer) in un clip di prumuzioni ch’è vo truvareti in leia cù un artìculu di Futura-Sciences.

« U Sciintificuhju » vi prega bon ventu (è ancu bon soli), cari marinali !

#EnergyObserver #BateauHydrogène #HydrogenShip

Leia futura-sciences : http://www.futura-sciences.com/…/energie-renouvelable-deco…/

Ritrattu : http://www.bateaux.com