À L’ACCORTU… …NUTIZII ARCHIULÒGICHI :

Artìculu Facebook di u 14/02/17

– In Còrsica :

In Lucciana hè statu scupartu un locu di cultu didicatu à u Dìu Mithra. I mura d’una cappedda è pezza di a so stàtula sò stati ritrovi. Hè riprisintatu à cavaddu d’un torru ch’eddu sacrificheghja par offra à un mondu una riginirazioni.

Hè una cridenza nata in Persa 200 anni nanzi à Cristu è chì si sparghji in u Imperu Rumanu. Dopu, cuncurenti di u Cristianìsimu, sarà intardita à u IVu sèculu. Era trasmissa di modu urali (senza scritturi sacri) da iniziatu à iniziatu. I nuzioni d’amicizia è di lialtà èrani di primura. Mithra era pupularu ind’è i suldati rumani è ancu i schiavi.

Da leghja : http://www.corsematin.com/article/article/mithra-mariana-a-trouve-son-dieu

Ritrattu : hè u pezzu d’unu ritrattu presu da Serge Ottaviani, cullizzioni Burghese in u Louvre-Lens.

– In Cisghjurdanìa :

Una sàpara nova, hè stata scuparta da univarsitarii israiliani in un à piccu di u disertu di Ghjudea. Ghjè quì chì da 1947 à 1956 sò stati ritrovi i famosi rullò di u mari Mortu. Par disgrazia ‘ssa sàpara nova pari d’essa stata dighjà visitata (com’è ni poni tistimunià mànichi di pioli di l’anni 50a) da latri chì si sò sicuramenti arrupati u so cuntinutu di valori è chì si pudìa rivenda à u marcatu neru. Fèrmani quantunqua mori stuedda in tarra cotta, tutti sciappati, pizzuchja di stofi è sopra à tuttu, un pezzu di cartapècura, di prima abordu senza scrittura ma chì sarà sottumissu à una anàlisi più fina…

Da leghja : https://www.sciencesetavenir.fr/archeo-paleo/archeologie/manuscrits-de-la-mer-morte-une-nouvelle-grotte-decouverte-a-qumran_110468

– À u Brasiliu :

In Amazunìa, figuri giganti è giumètrichi sò stati scuparti. À quandu in forma di chjerchju, à quandu di quatru, à quandu cù un fossu o à quandu rialzati… sò cintinai di chjosi mistiriosi chì i furesti diradichati ani fattu affaccà.  Poni ramintà i famosi figuri di u Perù è di u Chili, ancu s’eddi ùn irriprisèntani micca nè òmini nè animali. I studia cunfìrmani ch’eddi sò l’òpari di pupulazioni priistòrichi. Una prova ch’in fin’ di contu i furesti ditti primarii ùn l’èrani tantu è chì l’òmini di tandu ani impastatu ancu eddi u paisaghju. Intantu, pari chì i pòpuli à l’urìcini di ‘ssi custruzzioni sò spariti, stirpati da i malatìi è rimpiazzati par d’altri. ‘Ssi rializazioni, vechji di 2000 anni, fèrmani un misteri è i circadori ùn sani troppu chì funzioni pudìani avè…

#DécouverteMithra #DicoveryMithra

Da leghja : https://www.sciencesetavenir.fr/archeo-paleo/archeologie/les-enigmatiques-geoglyphes-d-amazonie_110469

L’ALGHI VERDI PONI CAMPÀ IN U SPAZIU

Artìculu Facebook di u 10/02/17

L’alghi ani riisciutu à campà in u spaziu, for’ di a stazioni urbitali intirnaziunali.

L’alghi sò stati imbarcati drentu à a stazioni urbitali è dopu sò stati piazzati fora. Avìani par sola prutizzioni un filtru par riducia l’iffettu di i radiazioni.

Si trata d’urganìsimi prisenti d’abitùdina in Nurveghja è in Antàrticu, avvezzi à cundizioni diffìciuli : timpiratura alti di 60 °C, timpiraturi bassi di -25 °C, trasicchera, notti longhi senza futtusìntasi pussìbuli, ricizzioni di mori ultraviuletta…

Partuti di luddu 2014 sò vultati à nantu à a Tarra di luddu 2016. Dopu à parechji mesa i circadori ani pussutu veda ch’eddi ripiddàiani a so crèscita. Era un fattu acquistatu : l’alghi avìani riisciutu à campà in u spaziu.

HÈ PIÙ CHÈ INTARISSANTI PÀ A CULUNIZAZIONI DI MARZU.

‘Ssa scuparta sarà d’un aiutu maiori pà a culunizazioni di antra pianetta com’è Marzu. Sottu à una vitrera pudarani pruducia nutritura è ussigenu.

I sciintìfichi studièghjani dinò i cunsiquenzi à nantu à l’ADN di l’alghi, dopu à ‘ssa   missa in cuntattu cù u biotu intersidirali. Ciò chì s’impara pà ‘ssi pìcculi urganìsimi pò sempri aiutà à capì i mudificazioni pussìbuli à nantu à l’ADN di l’omu…

Da nutà chì a industrìa agrualimintaria s’intaressa dinò à i prupriità di ‘ssi alghi è in fini, chì quiddi chì pènsani chì a vita à nantu à a Tarra hè nata da micruurganìsimi affaccati da u fora, ci vèdini di sicuru un argumentu.

Eccu dunqua una pìccula spirienza, cù urganìsimi minori ma cù cunsiquenzi maiori…

Da suvità…

#AlguesVertesEspace #GreenAlgaeSpace

Da leghja : https://www.sciencesetavenir.fr/espace

Ritrattu : https://stock.adobe.com/fr/search?k=station+orbitale

L’ANDUMITRIOSA : MALATÌA POCA CUNNISCIUTA È DIAGNUSTICATA SUVENTI TROPPU TARDI.

Artìculu Facebook di u 05/02/17

Hè una malatìa crònica, chì ancu midicata pò vultà è chì cuncerna i donni in anni di fà i fiddoli. Hè à bastanza fraquenti (tocca una donna à nantu à deci).

L’andumetru hè u tissutu chì copri l’uteru. In u cìculu nurmali di a donna l’andumetru cresci par essa prontu in casu di grussezza. Sì ficundazioni ùn ci n’hè, si sdrughji è pruduci u sangui di i fèmini. Hè a norma. Or ind’è i donni tocchi da l’andumitriosa, cèdduli di l’andumetru ani da ricuddà par vìa di i trombi è sviluppassi dopu for’ di l’uteru, culunizendu altri òrgani. Di règula sò tocchi l’òrgani ginitali è l’òrgani di u saccu adduminali ma dinò si pò sparghja à l’apparechja urinariu, digistivu o ancu pulmunariu.

Comu si manifisteghja ?

A maiò parti di u tempu sò dulora forti è pò ancu cunducia à a infirtilità.

I dulora affàccani più particularamenti quand’eddi t’ani i so sangui i fèmini (suventi si dici ch’eddu hè nurmali è ùn si pensa à ‘ssa malatìa). Certi volti hè à l’uccasioni di i rapporta sissuali o quand’eddu si và in cabinettu…

Da nutà chì in certi casi ùn si manifisteghja micca è si scopri par azardu quandu si ricerca una raghjoni à una dificultà à uttena un ziteddu.

Ancu assà, tutti ‘ssi lisioni di l’andumetru è i culunizazioni d’òrgani ùn sò murtali. Hè raru ch’eddi impighjurìschini da duvintà gattivi gattivi sopra à tuttu s’eddi sò trattati.

Comu si midicheghja ?

Pà riducia i dulora si pò fà un trattamentu urmunali ma a chirugìa hè u trattamentu di rifarenza. Par disgrazia certi volti, si càcciani i dulora ma nasci un antru prublema : a incuntinenza.

Una malatìa ch’ùn hè ancu capita bè.

I miccanìsimi stessi di a so ghjunta ùn sò cunnisciuti bè. Di prima abordu, hè una ricuddata di sangui chì cunduci in i trombi pezza d’andumetru in capacità di sviluppassi dopu in corpu. ‘Ssu sviluppu pari dipenda dopu di caràttari pròprii à a parsona tocca. I circadori pùgnani d’indintificà i gena chì poni essa rispunsèvuli di l’attivazioni di ‘ssa malatìa.

#Andométriose #Endometriosis

Da leghja: http://www.inserm.fr/dossiers-d-information/endometriose

Da fighjulà : (Europe1) https://www.youtube.com/watch?v=lEk9Bb4c5GI

Ritrattu : https://stock.adobe.com

ZITEDDU À TRÈ PARENTI BIULÒGICHI !

Artìculu Facebbok di u 02/02/17

In u 2015 u Riamu Unitu daghjìa l’auturizazioni par falla. In u 2016 u Mèssicu a facìa pà a prima volta. Avà hè in Uccrena (era u 5 di ghjinnaghju 2017) ch’eddu hè natu un ziteddu cuncipitu cù u matiriali ginèticu di trè parenti. Infurmazioni di primura chì di sicuru chjàmani à una riflissioni à u niveddu èticu… Ci vultaremu.

#TroisParents #ThreeParents

Ritrattu : https://pixabay.com

I VITTURI BULANTI : CI SEMU GUASGI !

Artìculu Facebook di u 01/02/17

Eccu, unipochi d’infurmazioni à l’accortu :

Ùn màncani i prugetta sedii, chì si duvarìani cuncritizà in un avvena vicinu… Xplorair, u dronu d’Ehang, u dronu d’Airbus, u dronu d’Uber, a Terrafugia TF-X, u prugettu di « piattinu bulanti » di Zapata Racing (cuncipitori di u Flyboard Air, chì pirmetti dighjà à un omu « spurtivu » di bulà!).

Di sicuru, vultaremu à nantu à tutti ‘ssi prugetta, sviluppendu i infurmazioni à nantu. À prestu !

# Voiture Volante #FlyingCar

Ritrattu : http://www.laterredufutur.com

I VIRUS CUMINICHÈGHJANI !

Artìculu Facebook di u 29/01/17

Circadori israiliani ani missu in ividenza un veru sistema di cuminicazioni trà virus. A scuparta s’hè fatta di manera indiretta, un pocu par azardu… I circadori studiàiani ghjustu à puntu a cuminicazioni di i battirìi è vulìani veda s’eddi èrani in capacità di privènasi d’un attaccu di virus. Or, in fin’ di contu, quiddi chì cuminicàiani, èrani i virus.

Comu si passa l’affari ?

Quand’eddi attàccani i virus, li tocca à firmà beddi attivi : ùn hè ora d’addurmintassi ! Par quissa ani un genu chì li cumanda d’ùn entra in una fasa « durmanti ». Or, à tempu ch’eddi si fìccani in una battitìa, par nutrìsciasi è riprudùciasi, làmpani una mulècula (chjamata « abritrium ») chì parti è s’infrugna in una antra battirìa ancu attaccata. Tandu, l’altri virus ani da pudè scedda : o multiplicassi o addurmintassi.

Chì hè a lògica ?

Si tratta pà u virus d’ùn tumbà tutti i battirìi d’un colpu chì o sinnò ùn avarìa più à bastanza matiriali par riprudùciasi è finisciarìa par sparì. Laca allora unipochi di battirìi vivi, i laca sviluppassi è quandu eddu ci n’hè dinò à bastanza si lampa in una antra fasa d’attaccu è cuntinueghja à multiplicassi.

Eccu una stratigìa bedda cumplessa in manu à un affaruchju beddu sèmpliciu… Si tratta d’una strattigìa par gistì à u meddu i risorsi, un pocu com’eddu a faci l’Omu quand’eddu cerca à rigulamintà a pesca o a caccia…

Di sicuru hè una scuparta di primura chì ni chjama d’altri…

#CommunicationVirus

Da leghja : http://sante.lefigaro.fr/article/les-virus-se-parlent-avant-d-attaquer

Ritrattu : https://pixabay.com