U COVID-19, UNA MALATÌA ANTRUPUCENA.

– usciintificuchju.com – Luni u 23 di marzu 2020.

Bonghjornu. Semu di branu. Casca bè, postu chì “U Sciintificuchju” faci a so riapparizioni, un pocu com’eddi a fàcini i fiora in a machja. Facìa un pezzu chì i publicazioni ùn s’èrani più fatti è ùn si sà s’eddi si farani sempri chì l’affari dumanda tempu… Intantu, pruvaremu à essa dinò un pocu prisenti.

Semu di branu, una èpica nè troppa calda, nè troppa freta… una èpica favurèvuli à i spassighjati, in una natura chì si spanna è chì vi rendi allegru. Di règula viaghja cussì ma quistu annu l’affari hè altru… è avareti capitu parchì. Parchì semu in piena crisa di u Curona Viru, una “grippaccia” chì indibbulisci u vosciu sistema rispiratoriu.

Cussì ci veni a prununcia : Curona, piuttostu chè Corona. Ùn si ni cambia u sensu chì u nomu di “Corona” hè statu datu à u viru parchì t’hà à nantu ad eddu una prutiina (chì assicura a leia cù u ricittori) cù una forma di curona. Sopra à tuttu quandu u viru si ficca ‘n i tissuta pulmunarii.

L’àrburi filuginèticu moscia chì ‘ssu viru, u SRAS-CoV-2, nomu ufficiali di u viru rispunsèvuli di a malatìa Covid-19 (par COrona VIrus Disease 2019), hè vicinu à quiddu di u SRAS di u 2003 è di u MERS di u 2012 è i malatìi s’assumìddani mori. À l’iniziu ci hè sempri un topu alutu. Veni à dì ch’eddu si tratta d’un duminiu cunnisciutu, ancu sì par avà nisciuna risposta tirapiùtica hè stata pruposta da veru. U Curona Viru faci parti d’una famidda maiurona di vira, chì sò i vira à ARN (acidu ribunuclèicu) cù un bracciu sèmpliciu di pularità dita pusitiva. Drentu à ‘ssa famidda ci sò l’alfacurona vira chì sò prisenti ind’è i mammìfari com’è l’omu. Asìstini dinò i bitacurona vira chì di règula sò adattati à i mammìfari ma micca à l’omu. Or, par vìa di sbaglia di trascrizzioni in a riplicazioni di u bracciu d’ARN, u bitacurona viru hà cunnisciutu mutazioni chì l’ani pirmissu d’adattassi à l’omu. Da u topu alutu hè passatu à u pangulinu (o furmiculaghjolu) po dopu, à bastanza facilamenti, à l’omu. Un viru chì finalamenti hè statu prestu idantificatu in China, grazia à i mètudi mulicularii novi in leia cù a infurmàtica. Nanzi ci vulìa parechji anni inveci ch’avà unipochi d’ori bàstani.

Dopu dinò è par disgrazia, u viru hà missu pocu tempu par ispàrghjasi è crià una pandimìa, tucchendu a pianeta sana. Or si rimarca sùpitu chì i loca d’infizzioni currispòndini à 100 % à loca ‘d’eddi ci sò l’afiò  chì pirmèttini di rilià i cuntinenti. Ciò chì raprisenta 4 miliarda di parsoni. Quandu si sà chì i pangulini pàttini d’un tràfficu chì i faci passà d’Afrrica à l’Asia, pudemu affirmà chì u curona viru hè pròpriu una malatìa antrupucena, veni à dì una malatìa in leia diretta cù a presa in manu di a pianeta da l’omu. Ciò chì vali pà u clima o a natura in ginirali, vali dinò pà i malatìi infizziosi.

Tandu hè sicura chì oramai ci tocca à campà cù ‘ssi malatìi novi, chì si spàrghjini cù a mundializazioni. È par paràssini si pò cuntà à nantu à à scuparta d’un vaccinu ma forsa dinò rifletta à comu ammaistrà di più i cuntaminazioni pussìbuli da l’animali à l’omu.

Da leghja : https://laviedesidees.fr/Covid-19-chronique-d-une-emergence-annoncee.html

Ritrattu : https://pixabay.com/fr/photos/coronavirus-virus-masque-corona-4914028/

GOOGLE AVARÌA TOCCU A SUPRIMAZÌA QUÀNTICA

– usciintificuchju.com – Ghjovi u 17 d’uttrovi 2019.

Pocu fà, Google hà fattu un annunciu impurtanti par ciò chì tocca à a ricerca à nantu à a infurmàtica di u futuru : a sucità califurniana dici d’avè toccu a suprimazìa quàntica. Veni à dì chì Google hà riisciutu hà fabbricà un urdinatori quànticu cù una capacità di càlculu d’una putenza chì trapassa a putenza d’un urdinatori tradiziunali. Par essa più pricisu si pò cunsidarà chì a suprimazìa quàntica pò essa uttinuta quandu a pussibilità di sbagliassi hè dèbbuli travaddendu cù urdinatori di omancu 50 qubits. Si parla di suprimazìa quandu u travaddu dumandatu hè talmenti maiori ch’ùn ci hè altra manera di rializallu chè incù un urdinatori quànticu.

Or, ghjustu à puntu, ‘ssa suprimazìa quàntica hè stata rializata fendu fà, da un urdinatori quànticu, un càlculu spìcificu in solu 3 minuti è 20 sicondi, inveci chì ci vurrìa 10 000 anni pà u più putenti di l’urdinatori attuali (u Summit) !

Intantu, i circadori di Google ani signalatu chì i so mascini quàntichi ùn pudìani par avà chè rializà un càlculu à tempu è ùn sò micca pronti par essa aduprati in l’industrìa. Ma una tappa hè stata francata è pian pianimu ci avvicinemu quantunqua da un usu giniralizatu di l’urdinatori quànticu.

Da leghja : https://www.journaldugeek.com/2019/09/23/google-suprematie-quantique/

Ritrattu : https://pixabay.com/fr/photos/l-ordinateur-quantique-processeur-3679893/

 

K2-18b : UNA PIANETA CÙ VAPORI D’ACQUA !

– usciintificuchju.com – Luni u 16 di sittembri 2019.

L’isupianeta K2-18b si trova à più di 110 annati di lumu da a Tarra, veni à dì à più d’un milionu di miliarda di chilòmitri. Hè luntana ma hè stata quantunqua u tiatru d’una scuparta strasurdinaria : i sciintìfichi ci ani trovu à nantu, a prisenza d’Acqua ! Dipoi ch’eddi sò trovi è ussirvati i pianeti strasulari hè a prima volta ch’eddu accadi. Par essa pricisu, hè a prisenza di vapori d’acqua ch’hè stata scuparta. Intantu, ferma iccizziunali è si franca quì una tappa nova in a ricerca di segna di vita al di là di u nosciu sistema sularu.

Hè u tiliscopu spaziali Hubble chì hà pirmissu ‘ssa scuparta è ghjè u risultatu di l’anàlisi di a so ussirvazioni rializata da 2016 à 2017. I sciintifichi ani custattatu chì ‘ssa pianeta pussidìa una atimòsfara è chì edda stessa cuntinìa mulèculi d’acqua. L’algurìtimi sviluppati par leghja i infurmazioni accolti da u tiliscopu Hubble mòsciani ancu chì a mulècula rilitiva à u vapori d’acqua si pò truvà à nantu à u sopra di a pianeta. Ùn ci dà l’assicuranza chì l’acqua lìquida asisti à nantu à ‘ssa pianeta ma pari più chè pussìbuli… Ciò chì a ci laca creda hè chì K2-18b si trova pricisamenti in una zona abitèvuli à pettu à a so stedda, à una distenza chì pirmetti l’asisenza d’una acqua lìquida ghjustu à puntu ! A timpiratura d’altrondi à nantu à K2-18b duvarìa essa à pocu pressu com’è à nantu à a noscia pianeta Tarra.

A ricerca ùn s’hà da piantà quì è i sciintìfichi ani da circà di cunnoscia meddu l’atimòsfara di a pianeta. Ani da fighjulà frà altru, s’eddi poni truvà a prisenza d’ussigenu o d’uzonu.

S’aspèttani tandu tutti ‘ssi risultata chì pudarìani fà a dimustrazioni chì a pianeta Tarra ùn hè ùnica è chì pò essa ancu pudarìani fà a dimustrazioni ch’ùn semu micca soli in l’Universu…

Da leghja : https://www.presse-citron.net/ces-scientifiques-sont-ils-proches-de-decouvrir-la-vie-sur-cette-exoplanete/

Ritrattu : https://pixabay.com/fr/illustrations/exoplan%C3%A8te-espace-monde-astronomie-2958949/

 

U GHJATTIVOLPI

– usciintificuchju.com – Ghjovi u 4 di luddu 2019.

Era mità di ghjunghju chì si n’hè fattu l’annunciu. Ci dispiaci ma mancàiami di tempu par riagì à ‘ssu mumentu quì. Intantu, « U Sciintificuchju » ùn pudìa stà senza arricchì i so pàcini d’un artìculu à nantu à a presa in a machja d’un animali chì si pudìa tema a sparizioni : u GHJATTIVOLPI !

Fèrmani sempri unipochi d’anziani chì n’ani vistu quand’eddi èrani ghjòvani. Ma dinò facìa anni è anni chì più nimu n’avìa infattatu. Da chjuchi, semu numarosi à avenni intesu parlà è spiràiami ch’eddu si pudarìa scuntrà in a machja ma mai fusti u casu… In fin’ di contu, i veri ùltimi tistimunianzi ricuddàiani à l’anni 50a. Dopu di modu uccasiunali si sarìani visti quì è culà ma senza troppu assicuranza. Po, dipoi 30 anni mancu più si ni parlaia è cuminciàiami à fassi una raghjoni : u ghjattivolpi hà asistutu è oghji sicuramenti ùn asisti più…

In u lipru pà i 6i di u prufissori di corsu, un pìcculu paràgrafu l’hè cunsacratu. Hè prisintatu com’è una spezia minacciata ma si laca spirà ch’unu scontru daretu à un machjonu hè sempri pussìbuli… Avìani a raghjoni ! Oramai hè ufficiali, u ghjattivolpi asisti sempri ! Sò l’agenti di l’Uffiziu di a caccia chì n’ani idintificatu una quindicina è parechji sò ancu stati marcati. Vòlini oramai chì ‘ssu animali sighi ricunnisciutu com’è una spezia nova è prutetta. Hè in i parti d’Ascu ch’eddu hè statu chjappu par essa studiatu, nanzi d’essa libaratu. Ùn hè statu fàciuli parchì l’animali campa mori a notti è cerca à fassi discretu è po copri un largu tarritoriu di 25 000 èttari sendu capaci di cuddà à 2 500 metra d’altitùdina. Misura 90 cèntimi da u capu à a punta d’a coda. T’hà i denti di l’ochji particularamenti sviluppati è hè rossu di culori. I so pela sò zeppi ciò chì u pruteghji da i pulgi, i pidochja è i zecchi. A so coda hè longa è grossa, pari quidda d’una volpi, ciò chì hà cuntribuitu à dà à ‘ssu animali u nomu di ghjattivolpi, in a Còrsica sana.

In fattu, « a stodia hà cumenciu in u 2008… ». A dici Pierre Benedetti di l’Uffiziu di a caccia : « S’hè fatta cù a presa imprivista d’un ghjattu in un ghjaddinaghju di u Capicorsu. Tandu, fusti iniziatu un prugrammu di ricerca. Grazia à tràppuli pà i pela hè statu stabilitu u ginomu di l’animali in u 2012… ». U so ADN pirmetti di diffarinziallu da u ghjattu salvàticu aurupeu. À u cuntrariu s’avvicina da u ghjattu furistieri africanu. Hè pò essa ghjuntu in Còrsica à tempu à una culunizazioni umana uparata versu 6 500 nanzi à Cristu. A so idantità pricisa ferma à ditarminà è par quissa ci voli à aspittà i risultata di a ricerca ginètica cundutta da un laburatoriu di u CNRS in Liò. Par cumplittà u studiu d’altri tràppuli sò stati ilaburati, prima par ritrattallu po in fini par chjappallu da veru, hè cussì chì l’agenti di l’uffiziu ani pussutu pona à nantu cuddani GPS. Sò numarosi i infurmazioni dighjà accolti ma fèrmani affari à imparà in quantu à a so ripruduzzioni è à u so rigimu alimantariu. Truvaremu a pacenzia par aspittà chì u più duru hè statu fattu : dà a prova chì u ghjattivolpi asistìa sempri !

Da leghja : https://www.lemonde.fr/planete/article/2019/06/14/le-chat-renard-corse-un-mythe-devenu-realite_5476228_3244.html

Ritrattu : https://le-tiit-chat.skyrock.com/1397520861-ghjattu-volpe.html

ADUPRÀ U PLÀSTICU PAR ALIMANTÀ I CARBURANTI D’AFIÒ

– usciintificuchju.com – Ghjovi u 30 di maghju 2019.

U trasportu airianu riprisenti 2,8 % di l’imissioni di CO2 in u mondu è ‘ssa quantità cresci sempri. D’altrondi hè privista una multiplicazioni par dui di u tràfficu da quì à 2037… D’un antru cantu a Tarra si ni sfraia sottu à u muddizzu di plàsticu : 10 tonni di plàsticu sò prudutti tutti i sicondi in u mondu è solu 9% sò riciclati, d’appressu l’UNU.

Or à suluzioni à ‘ssi prublema vinarà pò essa da a scuparta fatta da dui circadori chinesi, Hao Tang è Ning Li, di l’asitutu di chimìa è di fìsica di Dalian, cità di a pruvincia di u Liaoning. Ani missu à u puntu un mètudu par cunvirtiscia, u PIT (puliitilenu tiriftalatu) in idrucarbura ciclicchi è in cumpunenti arumàtichi, da riutilizà in a fabricazioni di u biugasoliu. U PIT hè u plàsticu chì custituisci i buttegli, è si ni pruduci tutti l’anni 50 miliona di tonni. U studiu fattu da i circadori chinesi hè statu publicatu in a riviasta Green Chemistry.

U PIT di i buttegli hè prima scumpostu in tiriftalatu di dimètilu cù l’aiutu di u mittanolu. Una volta ch’eddu hè rinfriscatu u dimètilu si poni sottu à una forma sòlida è pò essa spiccatu da u mitanolu. Dopu u dimètilu hè cunvirtitu in cicluizanu-1,4-dicarbussilatu po in ciclualcani è mulèculi arumàtichi par idruginazioni suvitata da una idrudiussiginazioni. Tutti ‘ssi uparazioni ‘sò fàciuli à rializà à u niveddu industriali è u randamentu di cunvirsioni hè altu postu chì a media hè di 98 %. L’idrucarbura uttinuti poni essa aduprati soli o à buleghju à d’altri biucarburanti par ammiddurà a so dinsità è dunqua riducia u so vulumu in u risirvoriu.

Ci vurrìa tandu à metta in piazza una filiera capaci di ricuparà mori plàsticu chì padarà essa trattatu… Sò nicissarii 1,5 chilò di buttegli par pruducia un litru di biucarburanti. Intantu, à difettu d’alimantà u tràfficu airianu à u niveddu mundiali sarà scuparta pudarà omancu cuntribuì à fà diminuì a quantità di plàsticu puluanti.

Da leghja : https://www.futura-sciences.com/planete/actualites/biocarburant-bientot-avions-propulses-plastique-recycle-76087/

Ritrattu : https://pixabay.com/fr/photos/avion-de-ligne-commercial-jet-avion-3628141/

FÀ MARCHJÀ I DRONA À NANTU À L’ACQUA !

– usciintificuchju.com – Luni u 29 d’aprili 2019.

À u XVIu sèculu l’avìani dighjà rimarcata artigliori di a marina : baddotti di cannonu ùn si ciuttàiani ubligaturiamenti in l’acqua ma pudìani ribumbà à nantu à l’acqua à cundizioni d’essa tirati sigondu à un certu àngulu. Oghji sò fìsichi di l’Univarsità di u Statu di l’Utah (USA) chì ci spiègani com’eddi fàcini sferi stinzatoghji par ribumbà è rutulà à nantu à l’acqua. Da ‘ssa scuparta spèrani di pudè cuncipì in u futuru, u design di drona chì sarani ancu eddi in capacità di « marchjà » à nantu à l’acqua !

I circadori ani adupratu camerà cù alti vitezzi par arrigistrà i muvimenta di sferi in siliconu sopra à una stesa d’acqua. Quand’eddi sò tirati cù un àngulu chjucu è à una vitezza à bastanza impurtanti, dopu à avè pichjatu à nantu à l’acqua, si mèttini à dispiazzassi di modu guasgi parallelu da sopra à l’acqua. Pàrini ch’eddi màrchjani à nantu à l’acqua.

I fìsichi spiègani u finòminu par vìa di a difurmazioni di i sferi chì làcani a so forma cù una giumitrìa parfetta par piddà una forma lungarina. A marchja à nantu à l’acqua currispondi in fattu à una cumbinazioni di rutazioni in cuntìnuu è di pìcculi salta rializati ghjustu sopra à l’acqua.

Sò infurmazioni novi in u duminiu di a fìsica chì s’intaressa à a impittera à nantu à l’acqua è chì di sicuru ùn mancarà d’intarissà i cuncipitori di drona ma ancu u geniu marìttimu…

Da leghja : https://www.futura-sciences.com/sciences/actualites/physique-grace-cette-decouverte-drones-pourront-marcher-eau-75836/

Ritrattu :  https://pixabay.com/fr/photos/insectes-scarab%C3%A9e-insecte-rides-1735667/

 

AMAZON VOLI PIAZZÀ PIÙ DI 3000 SATÈLLITI IN U SPAZIU PAR OFFRA INTERNET À TUTTI !

– usciintificuchju.com – Dumènica u 7 d’aprili 2019.

In l’òrbita bassa intornu à a pianeta ci hà da essa mori tràfficu ! Dopu à Space X, Facebook o ancu OneWeb hè oramai a sucità Amazon chì hà annunciatu ch’edda vulìa crià una reta di satèlliti par dà un accessu internet ancu à i zoni ditti bianchi.

Si tratta d’invià millai di satèlliti par copra i zoni ch’ùn irricèvini micca infurmazioni o chì sò mal’ sirvuti. ‘Ssu prugettu hè statu iniziatu da a figliali d’Amazon Kuiper Systems LLC. In più d’offra a pussibilità di copra a pianeta sana, sarà aduprata una alta vitezza par isparghja a infurmazioni. Una uparazioni com’è quista devi custà parechji miliarda d’aurò è cunducia à u lanciamentu di 3 236 satèlliti versu 600 chilòmitri d’altitùdina.

Hè un prugettu gigantescu è Amazon cerca partinarii par rializallu. Tandu, par invià i satèlliti in u spaziu, otantu hè a fusea New Shepard di a sucità Blue Origin chì si n’accuparà. In fattu, ‘ssu prugettu veni à aghjustassi à quattru altri :

–        U prugettu Loon di Google : si tratta d’impiigà ballò stratusfèrichi ingunfiati à l’eliu. I ballò dèvini stà in l’aria à pocu pressu 200 ghjorna aduprendu panedda sulari. I provi ani pirmissu di muscià chì i ballò pudìani copra un tarritoriu di 80 chilòmitri è ani pirmissu di serva zoni bianchi in Indunisìa.

–        U prugettu OneWeb s’appoghja eddu à nantu à 600 satèlliti.

–        U prugettu Athena di Facebook chì duvarìa appughjassi dinò à nantu à satèlliti.

–        U prugettu di SpaceX chì hà imaginatu unu ritiolu fattu di 12 000 micrusatèlliti chì pirmittarìani di copra i zoni mal’ sirvuti, par vìa d’una leia fatta cù un laseru.

Da leghja : https://www.futura-sciences.com/sciences/actualites/constellation-satellites-amazon-veut-deployer-plus-3000-satellites-fournir-internet-monde-entier-75637/

Ritrattu : https://pixabay.com/fr/illustrations/junk-espace-d%C3%A9bris-spatiaux-orbites-11645/

L’HACKERS RUSSII SARÌANI I PIÙ PRICULOSI

– usciintificuchju.com – Dumènica u 24 di frivaghju 2019.

CrowdStrike, una sucità amiricana spicializata in a cibera sicurità hà publicatu unu raportu à nantu à l’attacca di i reti. ‘Ssu studiu, chì porta à nantu à l’annu 2018, s’intaressa à u tempu missu pà infrugnassi drentu à unu ritiolu lucali. Tandu ani vistu chì solu 19 minuti bàstani à i pirati infurmàtichi par avè accessu à tutti i infurmazioni di primura chì unu ritiolu pò cuntena.

Certi attacca si sò fatti cù un viru chì s’impatrunisci di l’urdinatori è chì dumanda solda in iscambiu di a so « libarazioni ». Altri attacca, senza viru, ùn èrani micca fatti par vincia solda, è avìani solu l’ugittivu di nocia o di scruccà infurmazioni. Tandu èrani tocchi i media o i industrìi tinnulògichi. Si parla di spiunasgiu u è i Stata (com’è a China, l’Iranu o a Russìa…) sò allora dirittamenti impignati…

U più duru pà un hacker hè d’entra in una prima mascina postu chì i prutizzioni asìstini pà l’attacca chì vènini da internet. Inveci hè raru ch’ùn urdinatori sighi prutettu da un attaccu internu à u ritiolu. Tandu, una volta trovu un puntu d’intrata, basta pocu par cuntaminà tutti l’altri mascini missi in rilazioni. U studiu amiricanu, basatu à nantu à più di 30 000 attacca rializati in u 2018, faci risorta ch’eddi sò i squatri russii i più ifficaci. U « breakout time », o tempu missu par cuntaminà u sicondu urdinatori di unu ritiolu, hè solu di 18 minuti è 49 sicondi. Dopu à i russii sarìani i Curiani di u Nordu chì mèttini 2 ori è 20 minuti par ficcassi drentu à unu ritiolu. Hè più longu chè pà i russii è puri ferma sempri cortu pà un amministratori chì t’hà in càrica a difesa d’unu ritiolu par pudè idintificà l’attaccu è sapè comu riagì… Dopu ci sarìani i Chinesi ch’ani bisognu di 4 ori par cuntaminà urdinatori riliati trà d’eddi è dopu si parla di l’iraniani chì d’appressu à u raportu mèttini 5 ori è 9 minuti par rializà un pirataghju.

Da nutà ch’eddi asìstini gruppa di criminali littrònichi, ch’ùn sò micca spicìfichi à unu Statu in particulari, è chì ancu s’eddi t’ani bisognu di 9 ori par cuntaminà unu ritiolu, sò in capacità d’agì à nantu à a pianeta sana…D’appressu à u raportu ‘ssi gruppa sò di più in più pirfurmanti è u nùmaru di quiddi chì si mèttini à u sirviziu di i Stata và criscendu…

È u paesu chì hè in capacità di classificà l’hackers di u mondu, veni à dì u paesu indu’ hè statu publicatu ‘ssu raportu… veni à dì… i stata Uniti di Mèrica… chì capacità avarani eddi à cuntaminà un sistema infurmàticu ?… È di l’Aurupei dinò ùn si ni parla… Otantu hè unu raportu Russiu o Chinesu chì ci pò dà a risposta…

Da leghja : https://www.futura-sciences.com/tech/actualites/securite-hackers-russes-sont-plus-rapides-plus-dangereux-monde-75127/

Ritrattu : https://pixabay.com/fr/hacker-attaque-masque-internet-2883632/

SEMU INTRUTI IN UN MÌNIMU SULARU

– usciintificuchju.com – Ghjovi u 14 di frivaghju 2019.

U soli cunnosci cìcula di, à pocu pressu, 11 anni. À quandu tocca un Màssimu Sularu, à quandu tocca un Mìnimu Sularu. Quandu si tratta di Màssimu sularu, a stedda libareghja un màssimu di calori è sò numarosi i tacchi sulari. In u Mìnimu sularu, ci hè menu calori par vìa di a diminuzioni di l’ondi magnètichi è sparìscini i tacchi sulari.

I sciintìfichi ani pussutu custatà dinò ch’eddu era pussìbuli un Mìnimu sularu prulungatu. Tandu a Tarra entri in una pìccula èpica climàtica ghjacciata di parechji dicinìi… Era statu u casu da 1645 à 1715 è tandu u fiumu di Inguilterra, a Tamisa, era ghjilatu…Or l’ussirvazioni ricenti làcani pinsà chì da quì à 2050 u soli duvarìa essa particularamenti « frescu » !

Chì si passa in u soli ?

Ciò chì cundiziuneghja u cìculu hè l’attività di u cori di u soli. À quandu hè agitatu, à quandu hè à u riposu. Quand’edda hà toccu u so puntu u più altu, a fusioni nucliaria in u cori di u soli forma chjerchja magnètichi in l’atimòsfara è invìa di più ultraviulettu. Nàscini tandu tacchi sulari è iruzzioni.

È à nantu à a Tarra ?

Un Mìminu sularu cunduciarìa à una diminuzioni di a stratta d’uzonu, ciò chì limitarìa a prutizzioni di l’atimòsfara è in cunsiquenza cambiarìani mori i venta è i timpiraturi.

A simulazioni d’un Mìnimu sularu impurtanti è prulungatu privedi una riduzzioni di u riscaldamentu climàticu di 0,25% à nantu à 50 anni, da 2020 à 2070. Hè una bona, ma di sicuru, si parla solu di ralantiscimentu è mancu à pena d’arrestu…

Da leghja : https://blogdei.com/selon-le-nasa-l-activite-solaire-causera-hivers-longs-2050/

https://www.laterredufutur.com/accueil/le-minimum-solaire-est-arrive-et-peut-durer-plus-dune-decennie/

Ritrattu : https://www.google.fr/search?hl=fr&tbm=isch&source=hp&biw=1536&bih=705&ei=q7ljXIzCJMatgweIrb3gAw&q=minimum+solaire&oq=minimum+&gs_l=img.1.0.35i39j0l9.1887.4393..6583…0.0..0.80.591.8……1….1..gws-wiz-img…..0.VACUF6RARGs#imgrc=QpgIgxn4nbHPUM:

RICARCÀ UNA VITTURA LÈTTRICA PRESTU (GUASGI) COM’È PÀ UN PIENU D’ISSENZA

– usciintificuchju.com – Marti u 22 di ghjinnaghju 2019.

Hè a prumessa fatta da GBatteries, una startup canadiana. Dici ch’edda hà missu à u puntu una tinnulugìa par carcà à a lesra i battarìi à u litiomu chì asìstini oghji. S’edda funziuneghja da veru aiutarà di sicuru à u sviluppu di l’usu di a vittura lèttrica.

A startup ùn hà micca cercu à ammiddurà i battarìi stessi, com’è a fàcini d’altri impresi. A so ricerca hè basata piuttostu à nantu à l’adopru d’un lugizziali particulari par uttimizà l’usu di u currenti. Tandu, inveci d’imetta un currenti in cuntìnuu, l’algurìtimu accilareghja o ralantisci a càrica piddendu in contu diffarenti fattori, frà altru a timpiratura chì t’hà unu rolu dicisivu. Cussì bastarìani 10 minuti par ricarcà una battarìa di 60 chiluwattori (chì pirmetti di viaghjà à nantu à 380 chilòmitri).

Intantu, hè nanzi à tuttu un affari tiòricu postu ch’ùn ci hè stata par avà una prova in cundizioni riali. Eppuri i finanzamenta GBatteries l’hà. Vènini da Airbus Ventures, a sucità d’Airbus chì susteni i iniziativi novi in u duminiu tinnulògicu, cù di sicuru a spirenza d’avenni unu ritornu pusitivu à u niveddu finanziariu è stratègicu.

GBatteries ùn hà annunciatu una data di cumircializazioni di a so scuparta. Ani solu ramintatu chì di règula, nuvità di primura in u sittori autumòbili, affàccani più o menu tutti i 4 anni…

Da leghja : https://www.futura-sciences.com/tech/actualites/voiture-electrique-cette-startup-promet-recharger-voiture-electrique-aussi-vite-plein-essence-74719/

Ritrattu : https://pixabay.com/fr/voiture-%C3%A9lectrique-voiture-1458836/