– usciintificuchju.com -Vènnari u 5 di ghjinnaghju 2018
Dipoi u Bib Bang, 13 miliarda d’anni fà, u nosciu Universu ùn si pianta di crescia. Quand’eddu hè natu u nosciu Universu, sò stati inghjinnati irradiamenta litrumagnètichi chì prestu si sò sparti. Hè ciò chì hè chjamatu u Fondu Diffusu Cusmulògicu o irradiamentu fussili. À principiu l’Universu era mori caldu è dopu cù u tempu s’hè rinfriscatu. Tandu s’aspetta à truvà da par tuttu in l’Universu una timpiratura uniforma. Or, in u 2004 hè stata scuparta una rigioni particularamenti ghjilata chì ùn currispondi à i mudella stabiliti. Hè cunsidarata com’è sendu una anumalìa di u Cusmossu chì i sciintìfichi chjàmani u Cold Spot.
Durenti à un mumentu certi sciintìfichi ani crettu chì l’asistenza di ‘ssa rigioni ghjilata si pudìa spiigà par vìa di l’inirgìa nera (cumpunenti iputètica di l’Universu chì sarìa di prissioni nigativa). Tesa ricusata da pocu è altri sciintìfichi si dumàndani oramai sì ‘ssu locu di l’Universu ùn sarìa piuttostu a signatura di a tiurìa di u multiversu chì sottuponi l’asistenza di monda paralleli cù rialità diffarenti…
Novi misuri fatti da u spittugraffu di l’ussirvatoriu di Siding Spring in Australia, chì hà analizatu i signaturi di 7000 galassìi, cundùcini à pinsà chì u « Cold Spot » hè custituitu da unu insembu di biota avvinti di gaspi di galassìi. Or, pà l’astrònumi Tom Shanks è Ruari Mackenzie di l’Univarsità di Durhnam in Inguilterra, ‘ssa anumalìa ùn pò essa spiigata da a fìsica abituali. Tandu ani imaginatu chì ‘ssu fretu maiori pudìa essa u risultatu d’una cullisioni trà dui Universa paralleli. Par avali ùn si pò dimustrà cù u càlculu è di prima abbordu, a dìcini ancu eddi, a prubalità chì biota è cullisioni fùssini liati hè dèbbuli. Intantu, hè quantunqua pussìbuli è in u futuru un mudellu fìsicu novu sarà pò essa cunsacratu.
Sì ‘ssa tiurìa hè cunfirmata un ghjornu, sarà una vera rivuluzioni è tutta a fìsica muderna ni sarà mudificata. S’eddi asìstini parechji Universa l’uni sopraposti à l’altri, i leci fìsichi sarìani infiniti.
Da leghja : http://hitek.fr/actualite/univers-paralleles-possible-existence-recherches-scientifiques_12992
http://sciencepost.fr/2017/05/premieres-traces-de-multivers-ont-ete-decouvertes/
Ritrattu : https://pixabay.com/en/abstract-ancient-art-background-768131/
U Sciintificuchju 