TAMANTA STRAPPATA RIALIZATA DA U PINGUINU ALIMOZZA DI NOVA ZILANDA

– usciintificuchju.com – Màrcuri u 5 di sittembri 2018

Tutti l’anni di dicembri, pinguini alimozzi làcani i costi di Nova Zilanda par andà à nutrìsciasi in mari, parcurrendu a distenza strasurdinaria di… 6 800 chilòmitri !

A ci impara a rivista sciintìfica PLOS One chì fin’ d’aostu hà publicatu i risultata d’unu studiu univarsitariu.

Hè a prima volta chì i circadori rièscini à suvità accedi com’è quisti. ‘Ssu animali hè cunnisciutu in u mondu sanu. Piaci à l’aienti chì u tròvani biddinu. È puri era pocu studiatu…

U pinguinu alimozza stà in l’imìsfaru suttanu è ùn pò bulà, à l’inversu di u pinguinu alutu, chì pò bulà è stà in l’imìsfaru di u Nordu.

Ùn si sapìa troppu par avà ‘d’eddi partìani i pinguini alimozzi par circà a so nutritura è i zuòlughi pinsàiani ancu ch’eddi firmàiani vicinu à i costi. Par virificalla ani piazzatu balisi Argos à nantu à 20 di ‘ssi aceddi alimozzi è l’ani suvitati in i so dispiazzamenta cutidiani. Era in u quatru di u prugettu Tawaki (hè cussì ch’eddi chjàmani u pinguinu sopra à locu), purtatu da l’Univarsità d’Òtagu in Nova Zilanda. À principiu i circadori si sò dumandati s’eddu ùn ci era unu sbagliu in i misuri è po ani pussutu cunfirmà chì i pinguini alimozzi si rindìani in i zoni indu’ si scòntrani l’acqui caldi di u Nordu cù l’acqui freti di u Sudu. Da culà dopu vultàiani in Nova Zilanda. Un passa è vena di 6 801 chm chì una fèmina hà rializatu in 67 ghjorna.

I balisi sò firmati tuttu ‘ssu tempu solu à nantu à 5 animali. À nantu à l’altri si sò staccati nanzi à a fini di u parcorsu. Intantu, i infurmazioni accolti di modu glubali, ani pirmissu di cuncluda chì u pinguinu alimozza hè un natadori strasurdinariu, unu di i più pirfurmanti di a pianeta.

Ciò chì ferma un misteru hè a distinazioni di ‘ssi pinguini alimozzi. Parchì andà cussì luntanu inveci ch’eddi sò numarosi i pesci vicinu à i costi di a Nova Zilanda ? I sciintìfichi pènsani chì ‘ssu cumpurtamentu pò essa una làscita da una spezia antica chì tempi fà campaia più bassu chè a Nova Zilanda è avvezza à ricuddà più altu par nutrìsciasi.

U fattu si stà chì ni ferma à imparà à nantu à ‘ssu animali. Hè listessu par tutti i pinguini alimozzi di a pianeta da a Mèrica Suttana à a Nova Zilanda, passendu par l’Àfrica. Tutti sò minacciati, sicuramenti da u riscaldamentu climàticu, da u turìsimu è da a pesca intinsiva chì veni à privalli di so nutritura. Di cunnòsciali meddu aiutarìa à capì pricisamenti parchì diminuìscini i so pupulazioni è à sapè chì ci vurrìa à fà par pruttèghjali.

Da leghja : https://www.lejsl.com/actualite/2018/08/30/l-incroyable-marathon-des-manchots-de-nouvelle-zelande

http://outremers360.com/planete/biodiversite-lincroyable-marathon-du-manchot-tawaki-de-nouvelle-zelande/

 Ritrattu : https://pixabay.com/en/penguin-water-bird-swim-animal-1196947/

Laisser un commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion /  Changer )

Photo Google+

Vous commentez à l'aide de votre compte Google+. Déconnexion /  Changer )

Image Twitter

Vous commentez à l'aide de votre compte Twitter. Déconnexion /  Changer )

Photo Facebook

Vous commentez à l'aide de votre compte Facebook. Déconnexion /  Changer )

Connexion à %s