Artìculu Facebook di u 01/06/17
Una dumanda hè stata fatta da a sucità nurvigianna TGS NOPEC par pudè splurà idrucarbura lìquidi o gasosi, à u largu di a Còrsica è di a Sardegna. Si tratta d’un tarritoriu di 20 200 chm2, in faccia à Prupià.
U studiu giufìsicu hè dighjà in traccia di fassi…
A CTC si voli upponi à ‘ssu prugettu. A ci dici parchì à nantu à u so situ. Èccuni unu riassuntu :
– u mari Tarraniu hè un mari chjusu è tutta puluzioni avarìa cunsiquenzi di i più pèssimi.
– i rìsichi sìsmichi sò riali in i fonda sottumarini, è tafunà in ‘ssi loca hè più chè priculosu (tàppà una inzecca chì laca scappà u pitroliu piddarìa mesa è mesa).
– s’edda accadi una catastrofa, al di là di u scempiu iculògicu sarìa a ruvina di u turìsimu.
– ‘ssu prugettu và à l’incontru di l’Accordu di Parici (di u 12 dicembri 2015) chì cerca à riducia a pruduzzioni di l’inirgìi fòssili.
Tempu ùn hà persu u Prisidenti di l’Isicutivu Corsu, Gilles Simeoni, chì prestu hà ingagiatu iniziativi par pugnà di parà ‘ssu prugettu, vulendu impignà Francesco Pigliaru, u Prisidenti di l’Isicutivu Sardu, tutti l’ìsuli di u mari Tarraniu, u Prìncipu Albert II di Mònacu è di manera più larga, tutti l’iletti di l’Assamblea di Còrsica è ancu attori di a sucità civili.
D’altrondi, dighjà oghji s’imparaia chì u Statu talianu vulìa ancu eddu uppònasi à ‘ssu prugettu…
Di sicuru, s’aspèttani d’altri nutizii è ghjè un affari ch’emu da suvità da vicinu.
#ExploitationHydrocarburesCorseSardaigne #SfruttamentoIdrocarburiCorsicaSardegna #ExploitationHydrocarbonsCorsicaSardinia
Ritrattu : https://pixabay.com/en/oil-rig-sea-oil-gas-drill-2191711/
U Sciintificuchju 