Artìculu Facebook di u 12/08/17
Parechji vistichi sò stati missi à ghjornu in u quatru di scava privintivi, nanzi à a riabilitazioni di a caserna Montlaur di Bunifaziu. Hè un idifiziu à nantu à u piali di Bunifaziu, vicinu à u campusantu marinu. Ani cumenciu à fallu i ginuvesi in u 1732. Sarà finitu da i francesi dopu à a cunquista di 1769. L’ùltimu casamentu hè rializatu in u 1775. U situ militari chì si stendi à nantu à 4,6 èttari, sarà intardittu à i bunifazinchi intali à 1980. Dopu à a partenza di l’ùltimi militari, u ministeru francesu di a difesa hà finitu par sbarazzàssini è hè duvintatu prupriità di a Cullittività Tarrituriali di Còrsica in u 2001.
L’uparazioni archiulògica hè cundutta da Patrick Ferreira è cuncerna 14 439 m2, à nantu à zoni custruiti o micca custruiti, à cantu à l’idifizia riligiosi di a caserna. Dipoi 2014 sò stati missi in ividenza :
- i trasfurmazioni ch’eddi ani cunnisciutu i cappeddi.
- a prisenza di tombi di u XVIIIu è di XIXu sèculu.
- i nivedda d’accupazioni di u niulèticu anzianu (5500 anni nanzi à Cristu) è ricenti (3500 anni nanzi à Cristu).
Oramai hè finita a campagna di scava è u locu stessu hè statu dinò ricupartu. L’ussacami, i ciràmichi, i petri di sìlici è l’ussidiani scarpillinati sò stati cacciacti par essa studiati. U calcariu hè di sicuru ghjuvatoghju pà a cunsirvazioni di u matiriali ritrovu, sopra à tuttu l’ossa. Da quì à dui anni sarà publicatu unu raportu è tandu, frà altru, si ni saparà ancu di più à nantu à u modu di vita di l’òmini priistòrichi, i lei ch’eddi intrattinìani cù a Sardegna è ancu à nantu à u circondu naturali di l’èpica.
#FouillesCaserneMontlaurBonifacio #ExcavationMontlaurbarracksBonifacio
Da leghja : corse-matin di u 27/07/17
http://www.corsicatheque.com/Histoire-patrimoine/Divers/Caserne-de-Montlaur-de-Bonifacio
Ritrattu : https://pixabay.com/en/corsica-white-cliffs-cliff-441635/
U Sciintificuchju 