A nutizia ùn hè micca nova chì si ni parla dipoi dicembri 2016… I Curiani ani criatu unu rubottu (o robò) giganti degnu di u filmu Avatar o di u famosu filmu d’animazioni Goldorak.
Ùn si sà chì sò oghji i pirfurmenzi di a mascina chì avìa 8 mesa fà un passu pocu sicuru. Intantu pari dighjà di marchjà più prestu quandu si fighjula a videò d’accolta à nantu à u situ di a sucità curiana criatrici di ‘ssu robò, Hankook Mirae Technology. Sò à pocu pressu 200 miliona d’aurò chì sò stati invistiti dipoi 2014 par dà vita à ‘ssu giganti di farru è di ticnulugìa.
Misura 4 m d’altura è pesa 1 tonna è mezu. Pò essa cuntrullatu à distenza o par vìa d’un pilotu chì si stala in una cabina piazzata à u niveddu di u pettu. Inghji bracciu chì pesa 130 chilò pò cù pricisioni ripruducia i muvimenta di u pilotu. Si poni ancu manighjà i diffarenti dita d’inghji mani.
Hè statu fattu frà altru, par travaddà in i loca priculosi, in cundizioni stremi, indu’ l’òmini ùn poni intarvena. Pò purtà càrichi chì pèsani mori. Pudarìa serva dinò in i parca d’attrazzioni. U prisidenti di a impresa, Yang Jin-ho, hà ancu imaginatu ch’eddu ùn sighi ch’un prututipu chì pirmittarà dopu di rializà robò di tutti i tagli è sigondu i bisogna.
#RobotGéantCoréen #GiantKoreanRobot
Ritrattu : https://www.youtube.com/watch?v=Je1o1SFQ4yI
U Sciintificuchju 