– usciintificuchju.com – Dumènica l’11 di frivaghju 2018
Sò dui fèmini, di 22 anni è surtiti da pocu da a scola d’infirmieri di Charles Foix in Parici. Una hè brittona, uriginaria di Saint Malo è si chjama Armande Racinne (quidda à mancu à nantu à u ritrattu). L’altra hè corsa, uriginaria di Conca è si chjama Milena Petite (quidda à dritta à nantu à u ritrattu). Tutt’è du’ ani cumenciu à travaddà in una puliclìnica di i so loca ma tutt’è du’, nanzi di stallassi di modu difinitivu, ani avutu a vodda di parta à l’avintura in altrò, par aiutà d’altri pupulazioni è par iscopra una antra cultura.
Hè cussì chì i dui amichi ani fattu a scelta d’andà à u Pirù (Piruw in Chiciuà è Aimara ; Perú in ispagnolu). ‘Ssu paesu di Mèrica Suttana, di più di 30 miliona d’abitanti, cunnosci un dinamìsimu icunòmicu dipoi unipochi d’anni chì hà pirmissu una diminuzioni di a puvartà.
U paesu hà sappiutu ancu fà fronti à i crisi finanziarii intirnaziunali è à i timpurali ripititivi rispunsèvuli d’inundazioni cunsidarèvuli. Intantu, u nùmaru di i pòvari ferma par avà impurtanti (6 miliona) è sò maiori l’inigualità in a pupulazioni.
L’aqua currenti è a littricità sò stati ghjunti solu da pocu in i campagni. Hè quì chì ci hè mori bisogna sanitarii è chì i nosci infirmieri, allughjati in un dispansiariu, ani da circà di dà assistenza à l’aienti senza risorsi.
Par finanzà a so missioni, i dui amichi ani criatu un associu Solidaridad & Suyana, o « sulidarità è spirenza », a prima parola sendu spagnola è a siconda sendu chiciuà. Ani buscu allora sponsors par facilità u so viaghju è cumprà matiriali midicali.
Di sicuru, in ‘ssu paesu sarà par eddi una uccasioni di metta in pràtica ciò ch’ani imparatu à a scola è dinò di cunfruntassi à d’altri pràtichi curativi.
Intantu di vèdali dinò in casa soia, arricchiti da tutti i so spirienzi li prighemu un bon sughjornu !
Da leghja : http://www.expert-comptable-international.info/fr/pays/peru/economie-3 ; https://fr.actualitix.com/pays/per/perou-population-sous-le-seuil-de-pauvrete.php ; http://www.europe1.fr/international/perou-au-moins-133-morts-a-cause-des-intemperies-depuis-le-debut-2017-3313895
Ritrattu : associu Solidaridad & Suyana.
U Sciintificuchju 